Дзюдочиларимизнинг жамоавий баҳслардаги иштироки чорак финалдан бошланади
Хитойнинг Ордос шаҳри мезбонлик қилаётган дзюдо бўйича катталар ўртасидаги Осиё чемпионатининг жамоавий аралаш баҳсларига қуръа ташланди.
Қуръа натижасига кўра, мусобақада қитъамизнинг 10 та давлат терма жамоалари иштирок этадиган бўлди.
Улар орасида Ўзбекистон терма жамоаси ўз иштирокини тўғридан-тўғри 1/4 финалдан бошлайди. Дзюдочиларимизга ушбу босқичда Ҳиндистон терма жамоаси вакиллари қаршилик кўрсатади. Ушбу беллашувда +90, -73, -90, -57, -70 ҳамда +70 кг. вазн тоифаларида полвонлар татамига чиқади.
Эслатиб ўтамиз, 19 та давлатдан келган 200 нафарга яқин дзюдочи ғолиблик учун беллашган Осиё чемпионатининг яккалик баҳсларида Ўзбекистон терма жамоаси 1 та олтин, 3 та кумуш ва 6 та бронза, жами 10 та медаль жамғарди.
Жавоҳир Тошхўжаев, ЎзА
