Британиянинг Skytrax консалтинг компанияси томонидан тузиладиган World Airline Awards рейтингида Qatar Airways яна бир бор биринчи ўринни эгаллади. Бу билан компания тўққизинчи марта дунёнинг энг яхши авиакомпанияси унвонига сазовор бўлди.

Ғолиблар рўйхати Парижда бўлиб ўтган Халқаро авиакосмик салон доирасида эълон қилинди. Рейтинг 1999 йилдан бери ҳар йили Skytrax томонидан йўловчиларнинг фикрига асосланиб тузилади. Сўнгги таҳлилда 22,3 миллионга яқин йўловчи иштирок этиб, 325 дан ортиқ авиакомпанияни турли кўрсаткичлар бўйича баҳолаган. Кучли ўнталик қуйидагича шаклланди:

Qatar Airways — Ҳашамати, хизмат сифати ва замонавий самолётлари билан танилган. Кўп марта “Энг яхши авиакомпания” деб эътироф этилган.  

 Singapore Airlines — Юқори даражадаги хизмат, қулай ўриндиқлар ва самимий экипаж билан машҳур.  

 Emirates — Янги ва технологик ривожланган самолётлари (масалан, А380), ажойиб кўнгилочар тизими билан ажралиб туради.  

 ANA (All Nippon Airways) — Япониянинг энг йирик авиакомпанияси. Хизмат сифати ва тозаликка эътибор катта.  

 Cathay Pacific — Гонконг марказли авиакомпания. Хавфсизлик ва хизматда юқори стандартлар.  

 Turkish Airlines — Европани Осиё ва Африка билан боғловчи кўплаб йўналишларга эга. Мазали овқатлар билан танилган.  

 Air France — Франциянинг флагман авиакомпанияси. Услуб, маданият ва хизмат уйғунлиги.  

 Japan Airlines — ANAдан кейин Япониядаги етакчи авиакомпания. Сокин парвоз ва юқори хизмат даражаси билан танилган.  

 Korean Air — Корея Республикасининг энг йирик авиакомпанияси. Техник хавфсизлик ва хизмат даражаси юқори.  

 Hainan Airlines — Хитойнинг юқори даражали хизмат кўрсатадиган авиакомпанияларидан бири.

Бундан ташқари, “Энг яхши экипаж” номинациясида Singapore Airlines етакчилик қилди. Turkish Airlines эса Европа минтақасида энг яхши авиакомпания сифатида тан олинди. EVA Air  (Тайван) эса “Энг озода авиакомпания” номинациясида ғолиб бўлди.

Афсуски, Ўзбекистон авиакомпаниялари бу йилги энг яхши 100 талик рўйхатга кира олмади. Шунга қарамай, қўшни давлат Қозоғистондан Air Astana 36-ўринни, бюджет авиакомпанияси FlyArystan эса 87-ўринни эгаллади.

Skytrax рейтинги халқаро авиация соҳасида энг нуфузли кўрсаткичлардан бири ҳисобланади ва у авиакомпаниялар орасидаги рақобат, хизмат сифати ва йўловчи эҳтиёжларига эътибор даражасини акс эттиради.  

<iframe width="791" height="445" src="https://www.youtube.com/embed/G1V8CyLyJyA" title="Dunyoning eng yaxshi aviakompaniyalari reytingi e’lon qilindi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Мадинабону Насриева, Анвархўжа Аҳмедов (видео), ЎзА