Туркия Москва ва Киевга Украинада урушни тўхтатиш учун Истанбул жараёни доирасида барча томонлар иштирокида тинчлик конференцияси ўтказишни таклиф этиши мумкин, деб баёнот берди “РИА Новости”га туркиялик таҳлилчи, “Vatan” партияси марказий қўмитаси аъзоси Ўрчун Гёктурк.
Россия – Украина инқирози бошлангандан буён Туркия муайян дипломатик саъй-ҳаракатни амалга ошириб келмоқда. Яқинда РФ Президенти Владимир Путин ҳам мазкур ташаббусга ижобий баҳо бериб, “Биз туркиялик дўстларимизнинг инқирозли вазиятларни, жумладан Украина низосини ҳал қилишга ҳисса қўшишга уринаётганидан миннатдормиз”, – деган эди.
***
Агар Исроил билан “Ҳизбуллоҳ” ўртасида уруш бошланса, барча “қаршилик кучлари” ва мавжуд воситалар ёрдамида “Ҳизболлоҳ”ни қўллаб-қувватлаймиз, дея баёнот берди Эрон раҳбари маслаҳатчиси Камол Харрозий “Financial Times” газетасига берган интервьюсида.
Унинг таъкидлашича, Исроил “Ҳизбуллоҳ”га қарши кенг кўламли амалиётни бошласа, уруш бутун минтақада ёйилиб кетиши мумкин.
– Барча ливанликлар, араб мамлакатлари ва “қаршилик кучлари” аъзолари Исроил билан рақобатда Ливанни қўллаб-қувватлайди, – деди мулозим. – Бутун минтақага тарқалиши эҳтимоли мавжуд урушга минтақадаги барча мамлакатлар, жумладан Эрон ҳам қўшилиши мумкин. Бундай вазиятда “Ҳизбуллоҳ”ни қўллаб-қувватлашдан бўлак чорамиз қолмайди.
***
ХХР Раиси Си Цзиньпин Шанхай ҳамкорлик ташкилоти саммитида иштирок этиш учун Қозоғистонга йўл олиши олдидан эълон қилган мақоласида Остона анжумани иштирокчиларнинг умумий саъй-ҳаракати билан юқори савияда якунланиши, ШҲТ оиласи янада жипслашиши, ҳамкорлик тарихида янги саҳифа очилишига ишонч билдирди. Мақола “Казинформ” агентлиги сайтида эълон қилинган.
ШҲТ саммити 3-4 июль кунлари бўлиб ўтади.
***
Эртага Венесуэла ва АҚШ ҳукуматлари ўртасида тўғридан-тўғри мулоқот бошланади. Президент Николас Мадуро турли нотўғри талқинлардан холи бўлиши учун мулоқот оммага намойиш қилиб борилиши керак, деб ҳисоблайди.
– Венесуэланинг мутлақ суверенитети ва мустақиллиги таъминланиши шартига асосланган мулоқот ўзаро англаш руҳида ўтишини, келгусида муносабатларимиз ижобий томонга ўзгаришини ҳоҳлайман, – деган у. – Венесуэлани ҳурмат қилишлари шарт.
***
Венгрия Бош вазири Виктор Орбан бугун Киевда Президент Владимир Зеленский билан учрашади, деб ёзди “Financial Times” газетаси.
Аввалроқ Зеленский идораси раҳбари Андрей Ермак Орбан ва Зеленскийнинг юзма-юз учрашувини ташкил этиш кераклигини айтган эди. Венгрия ТИВ бундай учрашувни аввалдан тайёргарликсиз уюштиришнинг иложи йўқлиги, ижобий натижага эришиш имкони пайдо бўлсагина ўтказиш мумкинлигини маълум қилган эди.
***
Нидерландия ҳукумати 24 дона F-16 қирувчи самолётини экспорт қилишга рухсат берди, дастлабки учоқлар Украинага жўатилади, деди мудофаа вазири Кайса Оллонгрен.
Аввалроқ мамлакат Мудофаа вазирлиги Украинага F-16 самолётларининг биринчи тўплами ёз тугаши билан жўнатилишини айтганди.
***
Июнь ойида Киевда жонига суиқасд қилинган қозоғистонлик журналист Айдос Содиқов сешанба куни вафот этди. Бу ҳақда журналистнинг рафиқаси маълум қилган.
Украина ОАВ ёзишича, 18 июнь куни Киевда расмий қочқин мақомига эга қозоғистонлик мухолифатчи Айдос Содиқовга қарата қуролдан ўт очилган. Полиция ҳам Киевнинг Ярмоли кўчасида номаълум шахслар тўхтаб турган машинага қарата бир неча бор ўқ узганини тасдиқлаган. Бош прокурор идорасидан хабар қилинишича, суиқасдда Қозоғистон фуқаролари Алтай Жаканбаев ва Мейрам Каратаев гумонланмоқда.
***
Украина муаммосини, собиқ Президент Дональд Трамп айтаётганидек, бир кунда ҳал қилиш имконсиз, деди Россиянинг БМТдаги доимий вакили Василий Небензя.
Агар президент этиб сайланса, Трамп РФ ва Украина зиддиятини 24 соат ичида ҳал қилишини бир неча бор такрорлаган.
***
Франция Президенти Эммануэль Макрон ўзи тегишли “Биргаликда республика учун” коалицияси сайлов якунида парламентда камида 150 ўрин эгаллашидан умидвор, деб хабар тарқатди “RMC” радиостанцияси.
Миллий мажлисда жами депутатлик ўрни 577 тани ташкил этади. Парламентда кўпчиллик бўлиш учун 289 жой керак.
С.Раҳимов,
ЎзА