Диплом ва эсдалик совғалари билан тақдирланишди

Сайхунобод туманида «Беш ташаббус олимпиадаси» доирасида чим устида хоккей бўйича U-14 ёшгача бўлган ўсмир қизлар ўртасида Сирдарё вилояти чемпионати ўтказилди. Мусобақа Сайхунобод туманидаги спорт мактаби майдонида бўлиб ўтди.

Беллашувларда вилоятнинг турли ҳудудларидан ташриф буюрган ёш спортчилар ғолиблик учун ўзаро куч синашишди. Қизғин ва муросасиз кечган баҳсларда иштирокчилар жисмоний тайёргарлиги, тезкор қарор қабул қилиш маҳорати, жамоавий ҳаракат ва техник салоҳиятини намоён этишди.

Мусобақа якунига кўра, Сайхунобод тумани спорт мактаби жамоаси чемпионликни қўлга киритиб, биринчи ўринни эгаллади. Сардоба тумани спорт мактаби жамоаси иккинчи, Гулистон тумани спорт мактаби жамоаси эса учинчи ўринга сазовор бўлди.

Ғолиб ва совриндорлар мусобақа ташкилотчилари томонидан диплом ҳамда эсдалик совғалари билан тақдирланди.

Чим устидаги хоккей тезкорлиги, жамоавий ҳаракат ва аниқ техник маҳорати билан муз устидаги хоккейдан фарқ қилади. Бироқ ҳар икки спорт тури учун жамоавийлик, чаққонлик, аниқ ҳаракат ва ғалабага интилиш муҳим аҳамиятга эга.

Ушбу спорт тури ҳақида сўз борганда, унинг айрим жиҳатлари Шарқ ва Марказий Осиёда қадимдан кенг тарқалган чавгон ўйинини ёдга солади. Тарихий маълумотларга кўра, чавгон от устида ўйналадиган, махсус таёқ ёрдамида тўпни белгиланган нишон ёки рақиб томонга йўналтиришга асосланган қадимий жамоавий ўйин бўлган. У бир неча асрлар давомида Марказий Осиё, Эрон ва бошқа ҳудудларда кенг оммалашган ҳамда замонавий полонинг шаклланишига асос бўлган анъанавий ўйинлардан бири сифатида эътироф этилади.

Соҳибқирон Амир Темур даврини ёритувчи тарихий манбаларда ҳам отлиқлар тайёргарлиги, жисмоний чиниқиш ва ҳарбий маҳоратига алоҳида эътибор қаратилгани ҳақида маълумотлар учрайди. Жумладан, Низомиддин Шомийнинг «Зафарнома», шунингдек, Ғиёсиддин Али Яздийнинг «Рўзномайи ғазавоти Ҳиндистон» асарлари Темурийлар даври тарихини ўрганишда муҳим ёзма манбалар ҳисобланади.

Албатта, бугунги чим устидаги хоккейни қадимий чавгон билан айнан бир спорт тури сифатида баҳолаб бўлмайди. Бироқ улардаги жамоавий ҳаракат, тўп билан ишлаш, тезкорлик ва чаққонлик каби умумий жиҳатлар спорт ўйинларининг тарихий тараққиётидаги муштаракликни кўрсатади.

Сайхунободдаги чемпионат ёш қизларнинг спорт маҳоратини намойиш этиш баробарида, уларда соғлом рақобат, жамоавийлик ва ғалабага интилиш руҳини янада кучайтирди. Бундай мусобақалар эса ёшларни спортга кенг жалб этиш, бўш вақтини мазмунли ташкил қилиш ва янги истеъдодларни кашф этишда муҳим ўрин тутмоқда.

Ғулом Примов, ЎзА мухбири