CIES: Абдуқодир Ҳусанов дунёнинг энг қиммат футболчилари қаторида
Халқаро спорт тадқиқотлари маркази (CIES) дунёнинг энг қиммат 100 нафар футболчисидан иборат янги рейтингни эълон қилди.
Махсус статистик модель асосида шакллантирилган рейтингда Ламин Ямал («Барселона») 358,1 миллион евро баҳоси билан биринчи ўринни эгаллади. Кейинги поғоналардан «Манчестер Сити» ҳужумчиси Эрлинг Ҳоланд (227,3 миллион евро) ҳамда «Реал Мадрид» аъзоси Килиан Мбаппе (165,7 миллион евро) жой олган.
Эътиборлиси, ушбу рейтингдан Ўзбекистон миллий терма жамоаси ва «Манчестер Сити» ҳимоячиси Абдуқодир Ҳусанов ҳам ўрин олган. CIES мутахассислари ўзбекистонлик футболчининг трансфер қийматини 65,1 миллион евро деб баҳолаб, уни рейтингнинг 99-поғонасида қайд этган.
Эслатиб ўтамиз, куни кеча Халқаро футбол федерацияси (ФИФА) 2026 йилги Жаҳон чемпионати арафасида Абдуқодир Ҳусанов ҳақида махсус материал эълон қилган эди. Жумладан, ушбу хабарда А.Ҳусановни Ўзбекистоннинг Жаҳон чемпионати сари йўл олаётган энг ёрқин футбол юлдузларидан бири сифатида таърифлаган.
Қайд этилишича, Абдуқодир Ҳусанов 2025 йил январь ойида «Манчестер Сити» сафига қўшилиб, Англия Премьер-лигасида майдонга тушган илк ўзбекистонлик футболчи сифатида тарихдан жой олган. Шунингдек, у ўтган йили АҚШда ўтказилган клублар ўртасидаги жаҳон чемпионатида иштирок этган. Энди эса ҳимоячини футболдаги энг нуфузли мусобақа — 2026 йилги Жаҳон чемпионати кутмоқда.
ФИФА таъкидлаганидек, Абдуқодир Ҳусанов эндиликда дунё футболининг энг катта саҳнаси — Жаҳон чемпионатида янги тарих ёзиш остонасида турибди.
Жавоҳир Тошхўжаев,
ЎзА
