Бугун, 13 май куни Хитойда оғир атлетика бўйича катталар ўртасида ўтказилаётган Осиё чемпионатининг навбатдаги кунги мусобақаларида Ўзбекистон терма жамоасининг 2 нафар аъзоси медаллар учун курашга киришади.
Терма жамоамиз аъзоларидан Мадина Файзуллаева ва Ригина Адашбоева -81 килограмм оғирликда кечадиган баҳсларда ўз омадларини синовдан ўтказади.
Қитъа чемпионатининг кеча ташкил этилган мусобақаларида ҳамюртларимиздан Ҳайитбой Абдушукуров иштирок этди.
Илк бор катталар ўртасидаги нуфузли турнирда қатнашаётган ёш спортчимиз тажрибали рақибларига қарши муносиб баҳс олиб борди.
Муросасиз баҳслар натижасида ушбу вазн тоифасида энг ёш иштирокчи бўлган Ҳайитбой Абдушукуров даст кўтаришда 151, силтаб кўтаришда 191 ва икки кураш натижасига кўра 342 кг. тошни бўйсундирган ҳолда 4-ўринни эгаллади.
Эслатиб ўтамиз, чемпионатнинг эртанги кунги беллашувларида терма жамоамиз аъзоси, "Токио-2020" олимпиадаси ғолиби, "Париж-2024" олимпиадаси совриндори, жаҳон рекордчиси Акбар Жўраев Ватанимиз номини улуғлашга киришади.
Т.Рўзиев, ЎзА