Боксчиларимиз Россияда Ўзбекистон номини улуғлади
Россиянинг Набережные Челни шаҳрида ўтказилган “IBA.Pro 20” профессионал бокс кечасида мамлакатимиз боксчилари Ўзбекистон номини улуғлади.
Бир қатор номдор чарм қўлқоп усталари, Олимпия ўйинлари совриндорлари иштирок этган мазкур турнирда юртимизнинг 3 нафар боксчиси жанг ўтказди.
2019 йилги жаҳон чемпиони, ёзги Осиё ўйинлари ғолиби ва қитъа чемпиони, ҳамюртимиз Миразизбек Мирзахалилов иккинчи ўта енгил вазн тоифасида россиялик Чингиз Натиров билан “IBF European” камари учун 10 раундлик жангда рингга кўтарилди.
Шиддатли кечган баҳсда Мирзахалилов рақибидан ҳар жиҳатдан устун эканини намойиш этди. Ҳамюртимизнинг шиддатли зарбаларига дош бера олмаган россиялик боксчи 4 раунддан сўнг жангни давом эттира олмади ва Мирзахалилов техник нокаут эвазига чемпионлик камарини қўлга киритди.
Шунингдек, биринчи оғир вазн тоифасидаги баҳсда қатнашган Ҳалимжон Мамасолиев россиялик тажрибали боксчи Герман Скобенкони, маҳоратли боксчимиз Ҳавасбек Асадуллаев яна бир россиялик Сергей Лубковични 10 раундлик жангда очколар ҳисобида мағлуб этди.
Т.Рўзиев,
ЎзА
