Бокс: янгиланган рейтингда чарм-қўлқоп усталаримиз нечанчи поғоналарни банд этди?
World Boxing ташкилоти жорий йил июнь ойи ҳолати учун боксчиларнинг янгиланган рейтингини эълон қилди.
Янгиланган рейтингнинг эркаклар йўналишидаги 10 та вазн тоифасининг 6 тасида етакчиликни Ўзбекистон терма жамоаси аъзолари қўлга киритган бўлса, қолган 4 тасида Қозоғистон вакиллари қайд этилган.
Жумладан, Абдумалик Халаков(-60), Асадхўжа Мўйдинхўжаев(-65), Фазлиддин Эркинбоев(-75), Жавоҳир Умматалиев(-80), Акмалжон Исроилов(-85) ва Тўрабек Ҳабибуллаев(-90) ўз вазнларида рўйхатнинг энг юқорисидан ўрин эгаллади.
Шунингдек, терма жамоамиз аъзоларидан Жаҳонгир Зокиров, Миразизбек Мирзахалилов, Шаҳзод Музаффаров, Асилбек Жалилов, Шодиёр Мелиқўзиев, Абдураҳмон Муҳаммаджонов, Дилшод Абдумуродов, Абдуллоҳ Мадаминов, Шавкат Болтаев, Жасурбек Йўлдошев, Ҳалимжон Мамасолиев каби боксчиларимиз рейтингнинг кучли ўнлигида келтириб ўтилди.
Боксчи хотин-қизлар рўйхатида эса Сабина Бобоқулова(3), Феруза Казакова(9), Нигина Ўктамова(10), Ситора Турдибекова(12), Навбаҳор Ҳамидова(3), Азиза Зокирова(4) ва Рухшона Парпиева(5) муносиб ўринларни банд этди.
Т.Рўзиев, ЎзА
