Хабарингиз бор, Ўзбекистонда жорий йил 1 февралдан Тадбиркорлик субъектларининг барқарорлик рейтинги жорий этилди. Рейтинг натижалари Солиқ қўмитасининг электрон платформасида автоматик тарзда шакллантирилиб, Савдо-саноат палатасининг расмий веб-сайтида эълон қилиб борилмоқда. Шунингдек, рейтинг маълумотларини Солиқ мобиль иловаси ҳамда солиқ тўловчининг шахсий кабинетида кўриш имконияти яратилган.

Савдо саноат палатасининг маълум қилишича, ушбу тизим жорий қилинган кундан бугунгача ААА рейтингдаги тадбиркорларнинг 724 тасига 1,1 трлн. сўмлик ҚҚС суммаси 1 кунда текширувларсиз қайтариб берилди.

Шунингдек, А ва ундан юқори рейтингдаги 355 та тадбиркорлик субъектларининг солиқлардан (ҚҚС бундан мустасно) мавжуд 25,8 млрд. сўмлик ортиқча тўловлари 3 кун муддатда қайтариб берилди.

Товарларни импорт қилишда ва реализация қилишда 92 та тадбиркор томонидан тўланадиган 319,2 млрд. сўмлик ҚҚС суммалари ўзаро ҳисобга олинди.

Мазкур тизим 384,3 мингта корхонада хато ва камчиликлар аниқлаб текширувларсиз бартараф этилишига хизмат қилди.

Электрон ҳисобварақ-фактураларнинг белгиланган муддатларда расмийлаштирилиши жорий йилнинг бошига нисбатан 1,7 млн.тага ортиб 4,7 млн.тага етган.

Ш.Маматуропова, ЎзА