АҚШ ва Эрон тинчлик келишувига яқинлашмоқда (+видео)
АҚШ вице-президенти Жей Ди Вэнс Швейцарияда АҚШ-Эрон музокаралари тинчлик келишувига эришиш учун яхши замин яратганини маълум қилди, деб хабар берди Euronews нашри.
Расмийларнинг айтишича, Жэй Ди Вэнс, Муҳаммад Бағир Ғолибоф ва Аббос Арағчий Швейцарияни тарк этганидан кейин ҳам икки мамлакатнинг мутахассислари музокараларни давом эттирмоқда.
Томонлар бир нечта муҳим масалалар бўйича маълум даражада келишувга яқинлашган. Жумладан, жаҳон энергетика таъминоти учун муҳим аҳамиятга эга бўлган Ҳурмуз бўғози очиқ қолишини таъминлаш механизмлари муҳокама қилинган. Шунингдек, Ҳизбуллоҳ ҳаракати ўртасидаги можарони тартибга солиш масаласи ҳам кўриб чиқилган.
Ўтган ҳафта АҚШ президенти Дональд Трамп ҳамда Эрон президенти Маъсуд Пезешкиён томонидан имзоланган вақтинчалик келишув 60 кунлик музокаралар даврини назарда тутади. Бу жараёнда Теҳроннинг ядровий дастури каби муҳим масалалар муҳокама қилинади.
28 февралда АҚШ ва Исроил зарбалари бошланганидан кейин Эрон Ҳурмуз бўғозини ёпган эди. Бу эса халқаро бозорларда нефть ва ёқилғи нархларининг кескин ошишига сабаб бўлган.
Эндиликда вақтинчалик келишув натижасида бўғоз орқали кемалар ҳаракати тиклана бошлади. Миналардан тозалаш ишлари ҳали тўлиқ якунланмаган бўлса-да, ўтган дам олиш кунларида ўнлаб кемалар мазкур сув йўлидан ўтган.
Эрон парламенти раиси Ғолибоф Ҳурмуз бўғози Теҳрон назоратида қолишини, аммо халқаро ҳуқуқ нормаларига мувофиқ бошқарилишини билдирди. Унинг сўзларига кўра, кўзланган мақсад денгиз қатновини тўлиқ тиклаш ва минтақавий ҳамда жаҳон иқтисодиётига барқарорлик қайтариш.
Шу билан бирга, АҚШ Молия вазирлиги 60 кунлик махсус лицензия чиқариб, вақтинчалик келишув доирасида Эрон нефтига нисбатан айрим санкцияларни юмшатди. Бу ҳужжат ҳатто Эрон нефтини АҚШга етказиб беришга ҳам рухсат беради. Нефть бозори ҳам бу янгиликларга ижобий муносабат билдирди.
<iframe width="650" height="420" src="https://www.youtube.com/embed/lQ2WrNuB_QA" title="AQSH va Eron tinchlik kelishuviga yaqinlashmoqda" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Кенжа Бекжонов, Анвархўжа Аҳмедов,ЎзА
