АҚШ ва Эрон иккинчи музокарага тайёрланмоқда (+видео)
Ўтган дам олиш кунлари бўлиб ўтган биринчи музокаралар можарони тўлиқ тугатишга қаратилган бўлса-да, ҳеч қандай келишувга олиб келмади. Оқ уй маълум қилишича, Эроннинг ядровий дастури келишувга асосий тўсиқ бўлиб қолмоқда, деб хабар қилди Euronews.
Сешанба куни дипломатлар норасмий каналлар орқали АҚШ ва Эрон ўртасида янги тинчлик музокараларини ташкил этиш устида иш олиб боришди. Бу ҳолат Вашингтон Эрон портларига киришга чеклов жорий этгани ва бунга қарши Теҳрон минтақадаги нишонларга зарба бериш билан таҳдид қилганидан кейин юз берди.
АҚШ президенти Дональд Трампнинг таъкидлашича, иккинчи музокара Покистон пойтахтида бўлиб ўтиши мумкин.
БМТ бош котиби Антониу Гутерриш ҳам музокаралар қайта бошланишига ишонч билдирди. У Покистон бош вазирининг ўринбосари Муҳаммад Исҳоқ Дар билан бу масалада учрашганини ҳам айтди. “Бу инқирозни ҳарбий йўл билан ечиб бўлмайди. Тинчлик келишуви доимий мулоқот ва сиёсий иродани талаб қилади. Музокаралар қайта бошланиши керак”-деган Гутерриш.
Ҳозирча сулҳ сақланиб турган бўлса-да, Ҳурмуз бўғози атрофидаги вазият яна ҳарбий тўқнашувларга сабаб бўлиши ва минтақавий урушнинг иқтисодий оқибатларини кучайтириши мумкин.
Покистон яна АҚШ ва Эрон ўртасидаги иккинчи музокараларга мезбонлик қилишни таклиф қилди. Айни пайтда музокаралар бўйича маслаҳатлар давом этмоқда.
Маълумотларга кўра, Теҳрон ва Вашингтон музокара ўтказишга рози бўлган. Бироқ учрашув жойи, вақти ва делегациялар таркиби ҳали аниқ эмас. Исломобод ва Женева эҳтимолий музокара манзиллари сифатида кўриб чиқилмоқда.
Етти ҳафтадан бери давом этаётган уруш жаҳон бозорларига салбий таъсир кўрсатди. Кемалар қатнови тўхтаб қолди, ҳаво ҳужумлари эса минтақадаги ҳарбий ва фуқаролик инфратузилмасини вайрон қилди. Расмий маълумотларга кўра, Эронда камида 3000 киши ҳалок бўлган, Ливан эса 2000 дан ортиқ фуқаросини йўқотган. Форс кўрфази давлатлари ҳам талофат кўрган. Хуллас, бўлажак музокарадан зиддиятни бартараф этадиган келишувни кўпчилик кутмоқда.
<iframe width="640" height="420" src="https://www.youtube.com/embed/sFqR7IAsDIs" title="AQSH va Eron ikkinchi muzokaraga tayyorlanmoqda" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>К.Бекжонов, ЎзА
