АҚШ Сенати Эрон бўйича резолюцияни рад этди
АҚШ Сенати президентнинг Конгресс розилигисиз ҳарбий ҳаракат олиб бориш ҳуқуқини чекловчи резолюцияни тўртинчи марта рад этди, деб хабар берди DW нашри.
АҚШ Сенати Дональд Трамп маъмуриятини Эронга қарши ҳарбий ҳаракатларни тўхтатиш ва қўшинларни можаро ҳудудидан олиб чиқишга мажбур қилиши мумкин бўлган резолюцияни қўллаб-қувватламади.
Ҳужжатни тасдиқлаш учун Демократик партия вакиллари ташаббус кўрсатган. Унга 47 нафар сенатор ёқлаб деб овоз берган бўлса, 52 нафари қарши чиққан. Овоз бериш натижасига Республикачи партия устунлиги катта таъсир кўрсатган.
Демократлар Эронга қарши ҳарбий ҳаракатни ноқонуний ва етарли асосга эга эмас, деб ҳисоблайди. Улар резолюцияни яна Сенат муҳокамасига киритишни ва можаро тугамагунча овоз беришни давом эттиришни режалаштирмоқда.
Сенат йил бошидан буён Трампнинг ҳарбий қарорларини қўллаб келмоқда. 2026 йил бошидан бери Сенат тўртинчи марта ҳарбий ҳаракатларни чекловчи ҳужжат тасдиқланишини рад этди. Бу билан АҚШ Сенати ўзининг ҳарбий масалалардаги конституцион ваколатларини президент фойдасига чеклаб қўяётгани айтилмоқда.
1973 йилда қабул қилинган “Ҳарбий ваколатлар тўғрисидаги қонун”га кўра, Конгресс ҳарбий ҳаракатлар бошланганидан кейин 60 кун ичида уруш эълон қилиши ёки куч ишлатишга расмий рухсат бериши керак. Бу муддат апрель ойи охирида тугайди, аммо қонунчилик уни яна 30 кунга узайтиришга йўл бераяпти.
Мутахассисларнинг айтишича, яқин вақт ичида Дональд Трамп маъмурияти можарони ҳал қилиш ва кескинликни камайтириш бўйича аниқроқ режа тақдим этиши кутилмоқда. Шу билан бирга, АҚШда Қуролли кучлардан фойдаланиш қарорларида Конгресснинг ўрни ҳақидаги баҳслар ички сиёсатдаги асосий мавзулардан бири бўлиб қолмоқда.
<iframe width="560" height="315" src="https://www.youtube.com/embed/sMENAfL_mps?si=ASaG7EsOD0_WeFWO" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>К.Бекжонов, ЎзА
