АҚШ расмийлари Венесуэла президенти Николас Мадуро ва унинг рафиқаси Силия Флоресга нисбатан жиддий жиноий айбловлар қўйилганини маълум қилди. Улар наркобизнес ва бошқа оғир жиноятларда айбланмоқда.

АҚШ бош прокурори Памела Бондининг айтишича, иш Нью-Йорк штати жанубий округ судида кўриб чиқилади. Унинг сўзларига кўра, Николас Мадуро наркобизнес мақсадида тил бириктириш, кокаин олиб кириш бўйича жиноий келишув, шунингдек, пулемёт ва портловчи қурилмаларни ноқонуний сақлаш ва уларни АҚШга қарши қўллаш режаларида айбланмоқда.

Бондининг таъкидлашича, Мадуро ва унинг рафиқаси яқин орада Америка қонунлари доирасида жавобгарликка тортилади.

Шунингдек, АҚШ бош прокурори Мадуро ишида қатъият кўрсатгани учун АҚШ президенти Дональд Трампга миннатдорлик билдирган. Шу билан бирга, Мадуро ва унинг рафиқасини қўлга олиш бўйича амалга оширилган операцияда иштирок этган АҚШ ҳарбийларига ҳам алоҳида ташаккур билдирди.

АҚШ Адлия вазирлигига кўра, бу операция жуда муваффақиятли ўтган ва халқаро наркотрафикка қарши курашда муҳим қадам ҳисобланади.

                                                      Кенжа Бекжонов, ЎзА