Англия ва Аргентина ярим финалда: мундиалнинг энг кутилган тўқнашувларидан бири олдидан
2026 йилги футбол бўйича Жаҳон чемпионатининг чорак финал босқичи якунланди ва 1/2 финалга йўл олган барча терма жамоа номи аниқ бўлди.
Аниқроқ айтадиган бўлсак, АҚШнинг Майами шаҳридаги “Miami Stadium”да ўтказилган чорак финал баҳсида Англия миллий терма жамоаси Норвегия устидан 2:1 ҳисобида ғалаба қозонди. Учрашувнинг 36-дақиқасида Андреас Шельдеруп ҳисобни очиб, норвегияликларни олдинга олиб чиққан бўлса, биринчи бўлимга қўшиб берилган вақтнинг иккинчи дақиқасида Жуд Беллингем ҳисобни тенглаштирди.
Асосий вақт 1:1 ҳисобида якунланганидан сўнг жамоалар қўшимча бўлимларда ғолибни аниқлашга киришди. Беллингем 93-дақиқада ўзининг иккинчи голини киритиб, Англияга ярим финал йўлланмасини тақдим этди.
Миссури штати, Канзас-Сити шаҳридаги “Kansas City” стадионида ўтган Аргентина ва Швейцария терма жамоалари тўқнашуви 3:1 ҳисобида якунланди. Учрашувнинг 10-дақиқасида Алексис Макаллистер Лионель Месси бурчак тўпидан амалга оширган аниқ узатмани голга айлантириб, ҳисобни очди. Иккинчи бўлимда Дан Ндойе ҳисобни тенглаштиришга эришди.
Баҳснинг 72-дақиқасида муҳим вазият юзага келди. Дастлаб бош ҳакам Леандро Паредесга сариқ карточка кўрсатди. Бироқ VAR тизими орқали эпизод қайта кўриб чиқилгач, қарор ўзгартирилди ва Брель Эмболо симуляция қилгани учун иккинчи сариқ карточка билан майдондан четлатилди.
Бир нафар кам бўлиб қолган Швейцария қўшимча вақтда босимга дош бера олмади. 112-дақиқада Хулиан Альварес Аргентинани яна олдинга олиб чиққан бўлса, 120+1-дақиқада Лаутаро Мартинес учрашувга нуқта қўйди.
Дарвоқе, мазкур баҳс Лионель Месси учун ҳам тарихий аҳамият касб этди. Макаллистернинг голида ассист муаллифи бўлган тажрибали ҳужумчи жаҳон чемпионатлари тарихидаги 10-голли узатмасини амалга оширди ва ушбу натижага эришган илк футболчига айланди. Шунингдек, Месси 21 та гол билан мундиаллар тарихидаги энг яхши тўпурар бўлиб турибди.
Швейцария эса турнирни муносиб тарзда якунлади. Жамоа 1954 йилдан буён Жаҳон чемпионатидаги энг яхши натижасини такрорлаб, чорак финалгача етиб келди.
Шу тариқа, мундиалнинг яна бир ярим финалида Англия ва Аргентина терма жамоалари ўзаро куч синашади. Баҳс мамлакатимиз вақти билан 16 июль куни соат 00:00 да старт олади.
Жавоҳир Тошхўжаев, ЎзА
