6 нафар боксчимиз Осиё чемпионатининг саралашида жанг ўтказади
Бугун, 8 июль куни Индонезия пойтахти Жакарта шаҳрида бокс бўйича U19 ва U23 ёш тоифасида давом этаётган Осиё чемпионатининг учинчи кунги жангларида Ўзбекистон терма жамоасининг 6 нафар аъзоси жанг ўтказади.
Кеча чемпионатнинг иккинчи кунида U19 ёш тоифасидаги 22 та жуфтлик жанглари ўтказилган бўлса, терма жамоамиз аъзоларидан Муҳаммадризо Укимов -60 килограммда япониялик Рио Матсумотони 5:0 ҳисобида мағлуб этиб, кейинги босқичга йўл олди.
-65 кг. вазнда ўтган навбатдаги баҳсда ёш боксчимиз Иброҳим Шокиржонов қозоғистонлик Акжурек Калабай билан рўбарў келди. Бироқ, вакилимиз ҳакамларнинг қарорига кўра, имкониятни бой берди.
Бугун қитъа чемпионатида U23 ёш тоифасида 24 та жанг ташкил этилиши белгиланган бўлса, уларнинг 6 тасида мамлакатимиз чарм қўлқоп усталари ўз омадини синаб кўради.
Жуфтликлар билан танишинг:
-48 кг: Робияхон Бахтиёрова - Линда Сари (Индонезия)
-51 кг: Гулсевар Ғаниева - Хиан Багуин (Филиппин)
-54 кг: Узукжамол Юнусова - Милана Шихшабекова (Қирғиз Республикаси)
-57 кг: Хуморабону Мамажонова - Нурул Изза (Индонезия)
-60 кг: Муштарийбону Иброҳимжонова - Ти Нхунг Куанг (Вьетнам)
-65 кг: Севинч Хуррамова - Аружан Жангабаева (Қозоғистон)
Эслатиб ўтамиз, 17 июлга қадар U19 ва U23 ёш тоифасида эркаклар ва боксчи қизлар ўртасида ўтаётган чемпионатда мамлакатимизнинг 28 нафар спортчиси қатнашмоқда.
Т.Рўзиев,
ЎзА
