АОКАда Автомобиль йўллари қўмитаси ахборот хизмати раҳбари Нилуфар Жумаева иштирокида брифинг ўтказилди.
Қайд этилишича, мавжуд қонунчиликка асосан тадбиркорлик субъектларига аукцион савдолари орқали автомобиль йўлларида оғирлик ва габарит назорати бўйича стационар ва кўчма шохобчаларни қуриш ва ташкил этиш ваколати берилган. Ўлчов-назорат шохобчалари ўрнатиладиган жойлар электрон онлайн аукцион савдоларида ғолиб бўлган тадбиркорлик субъектларига 20 йил муддатга ижара асосида ва бошқа тадбиркорлик субъектига ўтказиш ҳуқуқи билан бириктирилади.
Шу билан бирга, ўлчов-назорат шохобчалари ўрнатиладиган жойларни электрон онлайн аукцион савдоларига чиқариш мақсадида Автомобиль йўллари қўмитаси томонидан стационар шохобчалар ўрнатиладиган 106 та жойнинг рўйхати шакллантирилиб, белгиланган тартибда Жамоат хавфсизлиги департаментининг Йўл ҳаракати хавфсизлиги хизмати ва Транспорт назорати инспекцияси билан келишилди ва тасдиқланди.
Шунингдек, тадбиркорлик субъектларига ўлчов-назорат шохобчалари ўрнатиладиган жойларни бириктириш мақсадида “Е-AUKSION” тизимида алоҳида Стационар шохобчалар ўрнатиш веб-саҳифаси яратилди. Биринчи босқичда 2025 йил 13 февраль санасидан бир ой давомида “E-auksion” электрон савдо платформасида республика бўйича жами 26 та ўлчов-назорат шохобчаси ўрнатиладиган жойлар эълони берилди. Бундан ташқари Автомобиль йўллари қўмитасининг расмий веб-сайти ҳамда ОАВларда бу ҳақда тегишлича тарғибот-ташвиқот ишлари олиб борилди.
“E-auksion” электрон савдо платформасидаги стационар шохобчалар ўрнатиш саҳифасида ўлчов-назорат шохобчалари ўрнатиладиган жойлар тўғрисидаги батафсил маълумотлар киритилган. “E-auksion” электрон савдо платформасида аукцион натижасига кўра аниқланган ғолиб томонидан тегишли тўловлар амалга оширилгандан сўнг баённома расмийлаштирилиб, ўн иш кунидан кечиктирмаган ҳолда Автомобиль йўллари қўмитаси ва аукцион ғолиби ўртасида ижара шартномаси тузилади.
Тадбиркорлик субъектларига ўлчов-назорат шохобчаларини қурилиш–монтаж ишларини амалга ошириш учун 12 ой муддат берилади. Стационар шохобча тадбиркор томонидан ўрнатилгандан сўнг синов тариқасида ишга туширилади.
Муҳайё Тошқораева,
ЎзА