“Давлат харидлари тўғрисида”ги қонунга кўра, давлат харидларининг асосий принципларида очиқлик ва шаффофлик, рақобат ва холислик, коррупцияга йўл қўймаслик кабилар устувор бўлиши керак.

Ҳар қандай эҳтимол тутилган, тахмин қилинаётган ёки мавжуд манфаатлар тўқнашуви ҳақидаги ахборот ошкор қилиниши зарур. 

Коррупцияга қарши курашиш агентлиги томонидан давлат харидларида қонунийликни таъминлашга қаратилган ўрганишлар давом эттирилмоқда. 

Агентлик давлат буюртмачиси томонидан 2,6 миллиард сўмлик давлат харидида қонунбузилишига йўл қўйилганини аниқлади. 

«Темирйўлинфратузилма» акциядорлик жамияти буюртмаси асосида 2,6 миллиард сўмлик “таъмирлаш хизматлари кўрсатиш” юзасидан ўтказилган давлат харидида “Давлат харидлари тўғрисида”ги қонуннинг қатор талабларига зид равишда ўзаро аффилланган шахслар иштирок этган.

Қайд этилган ҳолат юзасидан Агентликнинг тақдимномаси асосида харид комиссиясининг ғолибни аниқлаш ҳақидаги баённомалари бекор қилиниб, ноқонуний давлат харидининг олди олинди.

Ўрганиш ва таҳлиллар жараёнида тўпланган ҳужжатлар  қонуний чора кўриш учун ҳуқуқни муҳофаза қилувчи органларга юборилди.

Н.Абдураимова,

ЎзА