Лос-Анжелесда ўтадиган Олимпия ўйинлари расман 2028 йил 14-30 июль кунларига бегиланган, бироқ спорт турлари бўйича мусобақалар 12 июлдаёқ бошланиб кетади.

Дастлабки икки кун футбол, регби-7, чим устида хоккей, гандбол, сув полоси ва крикет бўйича ўйинлар старт олади.

14 июль куни очилиш маросими бир вақтда икки арена – “Los Angeles” Memorial Coliseum” ва “SoFi Stadium”да бўлиб ўтади.

15 июль куни медаллар тақсимлана бошлайди. Биринчи олтин медаль триатлонда берилади. 29 июль улкан анжуманнинг  воқеаларга энг бой куни: тахминан 35 спорт турида финаллар режалаштирилган.

30 июль куни мусобақанинг ёпилиш маросими, шунингдек баскетбол, гандбол, сув полоси ва бошқа жамоавий спорт турлари бўйича ҳал қилувчи баҳслар ташкил этилади.

Олимпия ўйинлари ташкилий қўмитаси тўлиқ жадвал билан расмий веб-сайтда танишиш мумкинлигини маълум қилган. Саҳифада 32 спорт тури, жумладан мусобақа жойи, саралаш босқичи ва финал кунлари кўрсатилган.