“Orient Silk Road Express” sayyohlik poyezdi Toshkentdan yo‘lga chiqdi
Toshkent shahridan joriy yilning ilk “Orient Silk Road Express” sayyohlik poyezdi tantanali ravishda yo‘lga chiqdi. Ushbu noyob poyezd “g‘ildirakdagi mehmonxona” sifatida e’tirof etilib, 2026-yilgi temiryo‘l turizmi mavsumiga rasman start berdi.
Mazkur sayohatda jahonning turli burchaklaridan kelgan 82 nafar sayyoh ishtirok etmoqda. Ular Germaniya, Buyuk Britaniya, AQSH, Fransiya, Shveysariya, Avstriya, Avstraliya, Kanada, Lyuksemburg, Singapur va Ispaniya davlatlaridan tashrif buyurgan. Bu esa O‘zbekistonning xalqaro turizm bozoridagi nufuzi ortib borayotganini yana bir bor tasdiqlaydi.
Sayyohlar uchun tayyorlangan dastur juda boy va mazmunli bo‘lib, ular Samarqand, Buxoro, Xiva va Toshkent shaharlariga tashrif buyuradi. Sayohat davomida mehmonlar nafaqat tarixiy obidalarni tomosha qiladi, balki mamlakatning boy madaniy merosi, an’analari va milliy qadriyatlari bilan yaqindan tanishish imkoniyatiga ega bo‘ladi.
Poyezddagi sharoitlar yuqori darajada tashkil etilgan bo‘lib, zamonaviy qulayliklar bilan jihozlangan. Sayohatchilar uchun shinam kupelar, yuqori sifatli xizmat ko‘rsatish, milliy va xalqaro taomlardan iborat menyu taqdim etiladi. Shu bois ushbu poyezd “g‘ildirakdagi mehmonxona” sifatida ta’riflanadi.
Marshrut afsonaviy Buyuk Ipak yo‘li bo‘ylab tashkil etilgan bo‘lib, u to‘rtta davlatni o‘zaro bog‘laydi va sayyohlarga unutilmas taassurotlar ulashadi. Tur dasturi O‘zbekiston hududida 9 kunlik sayohatni o‘z ichiga oladi.
Ushbu reys 2026-yil uchun rejalashtirilgan 12 ta sayyohlik poyezd qatnovining birinchisi hisoblanadi. Mutaxassislarning fikricha, bunday loyihalar mamlakat turizm salohiyatini yanada oshirishga xizmat qiladi.
Poyezd jo‘natilishi tantanali ruhda o‘tkazildi. Mehmonlar uchun milliy taomlar tortiq etildi, musiqa va madaniy dasturlar namoyish etildi. Shu tariqa, mehmonlarga o‘zbekona mehmondo‘stlikning yorqin namunasi ko‘rsatildi.
“Orient Silk Road Express” kabi loyihalar nafaqat turizmni rivojlantiradi, balki mamlakatlar o‘rtasida madaniy aloqalarni mustahkamlashga ham xizmat qiladi.
Muhayyo Toshqorayeva,
O‘zA
