Кураш: Францияда Президент соврини учун ўтказилган мусобақа ғолиблари тақдирланди

Париж шаҳридаги “Centre Sportif Emile Anthoine” майдонида кураш бўйича Ўзбекистон Республикаси Президенти соврини учун ўтказилган халқаро турнирда Англия, Франция, Греция, Германия, Ўзбекистон сингари 30 га яқин давлатнинг маҳоратли спортчилари миллий спортимизнинг жозибасини намойиш этди.

Анъанавий тарзда ўтказиб келинаётган мусобақа доирасида Францияда яшаб келаётган ватандошларимиз иштирокида ўзбек миллий ҳунармандчилиги, ошпазларининг кўргазмали чиқишлари ҳамда ўзбек санъаткорлари томонидан концерт дастурлари намойиш этилди.

Байрамона тарзда ўтган мусобақада ўз вазн тоифаларида Рачаел Ҳавкес (Буюк Британия), Анне Мбаиро (Франция), Самандарбек Садинов (Ўзбекистон) ва Шерали Жўраев (Ўзбекистон) ғолиблик шоҳсупасига кўтарилди.

Шунингдек, Исабелле Счуҳлеин (Германия), Кристина Стамоули (Греция), Нолвенн Ҳеберт (Франция), Члоэ Жессика Нун (Буюк Британия), Айлин Милл (Германия), Кубранур Эсир (Туркия), Алехандре Фереол (Франция) Мелиҳ Топcу (Туркия) Панагиотис Папаниколаоу (Греция) каби спортчилар совринли ўринларни қўлга киритди.

Ғолиб ва совриндорларни тақдирлаш маросимида иштирок этган Европа кураш конфедерацияси президенти Мерампи Илиадис, Ўзбекистоннинг Франциядаги элчиси Нодир Ғаниев мазкур турнир йилдан-йилга нуфузи ва географияси кенгайиб, дунёнинг энг кучлиларини ўзига ром этаётганини таъкидлади.

Т.Рўзиев,

ЎзА