Қатар пойтахти Доҳа шаҳрида ўтказилган ёшлар ва ўсмирлар ўртасидаги Осиё чемпионатида муваффақиятли иштирок этган мамлакатимиз ёш оғир атлетикачилари Ислом Каримов номидаги Тошкент халқаро аэропортида тантанали кутиб олинди.

Кутиб олиш маросимида иштирок этган спорт вазири ўринбосари, мамлакат Оғир атлетика федерацияси раисининг биринчи ўринбосари Ш.Маҳмудов бошчилигидаги федерация мутасаддилари, кенг жамоатчилик вакиллари терма жамоамизнинг йилнинг сўнгги нуфузли мусобақасида 44 та медаллар шодасига эга чиққани Ўзбекистон спортининг ўзига хос ютуғи эканлигини таъкидлади. Қитъа чемпионатида ғолиб ва совриндор бўлган спортчилар яна тўрт йилдан сўнг айнан навқирон ёшга етишини назарда тутсак, айнан улар келажакда Олимпия ўйинлари ғолиби, жаҳон чемпиони даражасига кўтарилган Руслан Нуриддинов ва Акбар Жўраевнинг муносиб издошлари бўлиши шубҳасиз.

Осиё чемпионатида ёш оғир атлетикачиларимизнинг умумжамоада 2-ўринни эгаллаши, ёш спортчимиз 17 ёшли Бекзод Ғофуржоновнинг ўсмирлар ўртасида жаҳон рекордини янгилагани юртимизда маҳоратли спортчиларни саралаш, танлаш тизими самарали кечаётганини англатмоқда.

Пойтахт аэропортида Ватанимиз спорт шуҳратини улуғлаган спортчиларимизга гулдасталар совға қилинди. Эзгу тилаклар билдирилди.

Янги йил остонасида бундай муваффақият ўнлаб оилаларга, маҳаллаларга ғолиблик шукуҳини, кўнгилларга қувонч ҳиссини жо этиши, янги муваффақиятларга чорлаши билан қадрли эканлиги таъкидланди.

Т. Рўзиев, ЎзА