Saylovdan keyin Isroilni nima kutadi? (+video)
Isroilda parlament saylovi varaqalarining 85,6 foizi sanab bo‘lindi. Hozircha mamlakatning amaldagi Bosh vaziri Binyamin Netanyaxuni qo‘llab-quvvatlovchi guruh sobiq Bosh shtab boshlig‘i Gadi Ayzenkot yetakchiligidagi muxolifatga qaraganda ko‘proq ovoz to‘plagani ma’lum. Binobarin, bu natija hukumat tuzish uchun yetarli emas, deyilgan VVS tarqatgan xabarda.
Dastlabki ma’lumotga ko‘ra, arab partiyalari Knessetda tarixan eng ko‘p o‘rin qo‘lga kiritishi mumkin. Ular koalitsiya tuzishda hal qiluvchi o‘rin egallashi ham ehtimoldan xoli emas. Bil’aks, Netanyaxu ham, Ayzenkot ham bu partiyalar bilan hamkorlik qilishni xohlamaydi.
Knessetda Netanyaxu tarafdorlari 53, Ayzenkot muxolifati 48 o‘rin olishi mumkin. Ikki arab partiyasi jami 19 mandatni qo‘lga kiritishi kutilyapti.
Ovoz sanash jarayoni yana bir necha kun davom etadi. Rasmiy natija 4-noyabr kuni e’lon qilinadi.
Isroilda hukumat tuzish uchun parlamentdagi mavjud 120 mandatdan kamida 61 o‘rinni qo‘lga kiritish lozim. Ya’ni, hech bir guruh muayyan chegaradan o‘ta olmasa, boshqa partiyalar bilan kelishishga majbur bo‘ladi.
Prezident Isxak Gersog partiyalar bilan maslahatlashib, hukumat tuzish uchun eng ko‘p imkoniyatga ega nomzodni tanlaydi. Da’vogarga koalitsiya tuzish uchun 28 kun beriladi. Zarur holda bu muddat 42 kungacha uzaytiriladi. Uch urinishdan keyin ham kelishuvga erishilmasa, qayta saylov tayinlanadi.
Ayni jarayondagi eng muhim omil – arab partiyalarining qarashi. Agar muxolifat ulardan ko‘mak olsa, hukumat tuzish imkoniga ega bo‘ladi. Aks holda Netanyaxu tarafdorlari boshqa o‘ng qanot partiyalarini og‘dirishga urinib ko‘radi.
Yana bir ehtimol bor: Netanyaxu va muxolifat o‘rtasida keng koalitsiya tuzilishi. Agar siyosiy kuchlar o‘zaro kelisha olmasa, yana saylov o‘tkaziladi.
Xullas, vaziyat hali aniq emas. Yaqin haftalarda bo‘lib o‘tadigan muzokaralar Isroil yangi hukumati tarkibi, mamlakat xavfsizligi va ichki siyosiy yo‘nalishini belgilab berishi mumkin.
Kenja Bekjonov, Anvarxo‘ja Ahmedov (video), O‘zA
