Наманган вилояти Поп туманидаги “Раис Санг” кўп тармоқли фермер хўжалиги раҳбари Илёс Ботиров “Ташаббус – 2015” республика кўрик-танловида “Йилнинг энг яхши фермери” йўналиши бўйича ғолиб деб топилди ва Президентимиз совғаси – “Spark” автомобили билан тақдирланди.

Наманган вилояти Поп туманидаги “Раис Санг” кўп тармоқли фермер хўжалиги раҳбари Илёс Ботиров “Ташаббус – 2015” республика кўрик-танловида “Йилнинг энг яхши фермери” йўналиши бўйича ғолиб деб топилди ва Президентимиз совғаси – “Spark” автомобили билан тақдирланди.

Халқимизда от изини той босар деган мақол бор. Илёс Ботиров ана шу ташбеҳнинг ҳаётий ҳақиқатлигини амалда исботлаб, “Отангга, балли!” деган сўзларни кўп бор эшитаётган ўғиллардан. Ҳозир кексалик гаштини сураётган отаси Аҳмаджон Ботиров бутун умр қишлоқ хўжалиги соҳасида ишлади. Онаси Инобатхон ая вилоятда фермерлик ҳаракатини бошлаб берганлардан. Бугун И.Ботиров раҳбарлик қилаётган “Раис Санг” фермер хўжалигини Инобатхон ая 2004 йилда 30 гектар ер олиб, ташкил қилган эди.

Ўттиз тўққиз ёшли фермернинг суяги далада қотган. Аввал Наманган муҳандислик-педагогика институтида муҳандис-механик, сўнгра Наманган муҳандислик-технология институтида иқтисодчи мутахассисликларини эгаллаган Илёс 2011 йилда онаси Инобатхон ая нафақага чиққач, “Раис Санг” фермер хўжалигини бошқаришни ўз зиммасига олди. Президентимиз раҳнамолигида қишлоқ хўжалигида амалга оширилаётган кенг кўламли ислоҳотлар, фермерлик ҳаракатини ривожлантириш, қишлоқдаги бош ислоҳотчи сифатида фермерларни ҳар томонлама қўллаб-қувватлашга қаратилаётган алоҳида эътибор деҳқон ўғлининг ғайратига ғайрат қўшди.

Ўтган йиллар мобайнида ёш фермер хўжалик ерларини кенгайтириш, ҳосилдорликни ошириш, моддий-техник базани мустаҳкамлаш, янги иш ўринлари очиш, ишчилар учун қулай меҳнат ва дам олиш шароитларини яратиш борасида изчил ишлар олиб борди. Ўттиз гектар ер майдони 140 гектарга етиб, кўп тармоқли хўжаликка айланди. Аввал битта “Т-4” русумли ҳайдов тракторига эга фермер лизинг шартномаси орқали иккита ерга ишлов берадиган, битта ем-хашак ўрадиган трактор ва бошқа агротехника воситаларини сотиб олди. Айниқса, “Орион С-630” трактори хўжалик аъзолари меҳнатини енгиллаштирди.

– Лизинг фермер учун жуда кенг имконият экан, – дейди Илёс Ботиров. – Техниканг етарли бўлса, ишинг унумли, демак, ҳосил ҳам шунга яраша салмоқли бўларкан. Буни бизнинг қисқа вақт ичида лизинг тўловларидан қутилиб, бешта қишлоқ хўжалиги техникасига эга бўлганимиз мисолида кўриш мумкин.

2011 йилда хўжалик ғалла майдонларининг ҳар гектаридан 21 центнердан ҳосил олган бўлса, ўтган йили бу кўрсаткич 38 центнерга етди, пахта ҳосилдорлиги ҳам 22 центнердан 32 центнерга ошди. Сирдарё соҳилидаги ўрта шўрланган ва тошлоқ ерларда ҳосилдорликни бундай кескин кўтариш осон иш эмас.

– Еримиз гарчи дарёга яқин бўлса-да, каналдан сув чиқмайди, – дейди хўжалик бош мироби Рустам Турсунов. – Собиркўл деган булоқ бор, шу булоқдан суғорилади, бунинг ўзига яраша қийинчиликлари бўлиб, сувнинг ҳар томчиси ҳисобда туради.

Хўжалик аъзолари жорий йилда 76,6 гектар майдонга чигитнинг янги – “Порлоқ-2” навини экиб, гектаридан 45 центнердан ҳосил кўтариш, режадаги 227 тонна ўрнига 280 тонналик хирмон уйиш мақсадида астойдил меҳнат қилмоқда. Эллик гектар майдондаги олтиндай товланаётган буғдойзор 130 тоннадан зиёд сара донни ваъда қилиб турибди.

Фермер хўжалигида 250 бошга яқин қўй ва эчки парваришланаётир. 2012 йилда “Агробанк”нинг Поп тумани филиалидан олинган 80 миллион сўмлик кредит маблағи кўмаги билан хориждан 10 бош зотли қорамол келтирилиб, чорва наслчилиги йўлга қўйилди. Бугунги кунда зотли қорамоллар сони 32 бошга етди. Ҳар бир соғин сигирдан кунига 28 литргача сут соғиб олинмоқда. Фермер яна бир йўналиш – сутни қайта ишлаш бўйича янги лойиҳани амалга оширишни дилига тугди. 2013 йилда ўз жамғармаси ёнига банкнинг 20 миллион сўмлик кредитини қўшиб, кунига 500 литр сутни қайта ишлаш қувватига эга замонавий технология келтириб, кефир, сметана, ряженка, творог, қаймоқ каби сут маҳсулотлари ишлаб чиқаришни йўлга қўйди. 2014 йилнинг ўзида 60 тоннага яқин сут қайта ишланиб, эл-юрт дастурхонига етказиб берилгани лойиҳанинг истиқболидан далолат беради. Энди фермер Санг қишлоғи ҳудудида қурилиши тугалланмаган икки қаватли бинони тасарруфига олиб, сутни қайта ишлаш цехини кенгайтиришни мақсад қилган.

“Раис Санг” фермер хўжалиги қошида ўтган йили ташкил қилинган мебель ишлаб чиқариш корхонасида Италия технологияси асосида тайёрланган шкаф, стол-стул, диван, эшик-ром, мактабгача таълим муассасаларига мўлжалланган мебеллар ҳам бозорни импорт ўрнини босувчи маҳсулотлар билан тўлдиришга хизмат қилмоқда. Корхона иш бошлаган йилнинг ўзидаёқ 40 миллион сўмликка яқин маҳсулот ишлаб чиқарилгани фикримиз далилидир.

Хўжаликнинг тикувчилик цехида касб-ҳунар коллежини битирган саккиз чевар қиз дастгоҳларни ғизиллатиб, болалар ва аёллар учун кийим-кечак тикмоқда.

Фермернинг пиллачилик, асаларичилик, иссиқхона бўйича ишлари ҳам мақтовга сазовор. Ўтган йили 2 тонна асал етиштирилгани фикримизни тасдиқлайди.

– Илёс Ботиров қишлоғимиз инфратузилмасини ривожлантириш, аҳоли турмуш маданиятини ошириш ишларига ҳам катта ёрдам бермоқда, – дейди Санг қишлоғининг Муқимий номидаги маҳалла фуқаролар йиғини раиси Ҳасанбой Абдуллаев. – Фермер хўжалигининг 25 миллион сўмдан зиёд ҳомийлик маблағи эвазига маҳалламизнинг 6 километрлик йўлига асфальт ётқизилиб, электр тармоғи тортилди.

Бугунги кунда фермер хўжалигида 60 дан зиёд киши доимий иш билан таъминланган, мавсумий ишчилар ҳисобга олинса, юзга яқин киши ўз меҳнати билан даромад топиб, рўзғор тебратмоқда.

– Мустақиллик туфайли ер ҳақиқий эгасини топди. Мен том маънода шу озод юртнинг эркин деҳқони-мулкдориман, – дейди фермер. – “Йилнинг энг яхши фермери” деган юксак эътирофга сазовор бўлганим, Президентимиз совринини қўлга киритганим катта ютуқ. Бу фаолиятимизни янада ривожлантириб, юртимиз тараққиёти ва халқимиз фаровонлиги йўлида бундан-да кўпроқ, сидқидилдан меҳнат қилишга ундайди.