Muhammad al-Xorazmiy nomidagi ixtisoslashtirilgan maktab axborot-kommunikatsiya texnologiyalari yo‘nalishiga oid fanlarni chuqurlashtirib o‘qitishga ixtisoslashtirilgan ta’lim maskani hisoblanadi.
Ixtisoslashtirilgan ta’lim muassasalari agentligi axborot xizmati rahbari Jo‘rabek Jangirov tomonidan taqdim etilgan ma’lumotlarga ko‘ra, Muhammad al-Xorazmiy nomidagi ixtisoslashtirilgan tayanch maktabining Buxoro, Xorazm, Farg‘ona, Sirdaryo va Jizzax viloyatlarida filiallari tashkil etilgan.
O‘zbek tili bo‘yicha 5-, 6-, 7-, 8-, 9-sinflarga o‘quvchilar faqat aniq fanlar yo‘nalishi bo‘yicha belgilangan kvota doirasida o‘qishga qabul qilinadi.
Maktablarda o‘qish istagida bo‘lgan talabgorlar o‘zlari ta’lim oladigan maktabi joylashgan hudud bo‘yicha joriy yilning 1 iyunidan 20 iyuniga qadar hujjatlarini faqat onlayn shaklda my.gov.uz hamda ariza.piima.uz saytlari orqali topshiradi.
Toshkent shahrida joylashgan Muhammad al-Xorazmiy nomidagi ixtisoslashtirilgan tayanch maktabiga esa barcha hududlardagi maktab o‘quvchilari hujjat topshirishlari mumkin.
Shunga ko‘ra, talabgor o‘quvchi faqatgina o‘zi ta’lim oladigan maktabi joylashgan hududdagi yoki Toshkent shahrida joylashgan Muhammad al-Xorazmiy nomidagi ixtisoslashtirilgan tayanch maktabining biriga hujjat topshira oladi.
Ma’lumot o‘rnida ta’kidlash lozimki, Muhammad al-Xorazmiy nomidagi ixtisoslashtirilgan tayanch maktabining filiallari respublikaning barcha hududlarida bosqichma-bosqich tashkil etilishi rejalashtirilgan. O‘tgan o‘quv yilida mazkur maktabning Nukus, Andijon, Samarqand shaharlarida filillari tashkil etilgan edi.
Muhayyo Toshqorayeva,
O‘zA