Joriy yilning 12 dekabr kuni Tailandning Bangkok shahrida World Boxing tashkiloti qoshida Osiyo boks konfederatsiyasi tashkil etilishi yuzasidan milliy federatsiyalar rahbarlari ishtirokida yig‘ilish bo‘lib o‘tgan edi.

Unda bir ovozdan Osiyoning 21 ta davlati “Los-Anjeles-2028” yozgi Olimpiya o‘yinlarida boks sport turini saqlab qolish yo‘lida World Boxing tashkilotining konfederatsiyasini yangidan tuzilishini ma’qulladi.  

Kuni kecha esa navbatdagi milliy federatsiyalar ishtirokida yig‘ilish bo‘lib o‘tdi. Unda yangi tuzilgan Asian Boxing tashkilotiga vaqtinchalik prezident etib tailandlik Pichay Chunxavajira saylandi.  

Shu bilan birga, tashkilotning nizomini va normativ hujjatlarini ishlab chiqish uchun vaqtinchalik ijroiya qo‘mitasi a’zolari ham saylandi.

Quvonarlisi, ushbu ro‘yxat tarkibiga O‘zbekiston boks federatsiyasi Bosh kotibi Shohid Tillaboyev ham kiritildi. O‘zbekiston boks federatsiyasi raisi maslahatchisi Malik Babayev Olimpiya komissiyasida faoliyatini davom ettiradigan bo‘ldi.

Javohir Toshxo‘jayev, O‘zA