Өзбекстан мен Қазақстан киік популяциясын қалпына келтіруде бірлесе жұмыс істейді.

Өзбекстанның Экология, қоршаған ортаны қорғау және климаттың өзгеруі жөніндегі министрлігі мен Қазақстанның Экология және табиғи ресурстар министрлігі жойылып кету қаупі төнген киікті сақтау бойынша мемлекетаралық ынтымақтастықты жүйелі түрде дамытып келеді.

Екі ел арасындағы екіжақты келіссөздер аясында киікті сақтау бойынша өзара түсіністік туралы меморандумға қол қою жоспарланған. Бұл құжат киік санын қалпына келтіру мақсатындағы кешенді бағдарламаларға негіз болады.

Меморандум аясында келесі бірлескен іс-шаралар көзделген:

• Киіктердің дәстүрлі көші-қоны бағыттарында олардың еркін қозғалысы мен қауіпсіздігін қамтамасыз ететін шекара маңындағы қорғалатын аумақтар мен көші-қон дәліздерін құру;
• Олардың қоректенуі мен көбеюі үшін маңызды болып саналатын табиғи жайылымдар, су қоймалары мен экожүйелерді қалпына келтіру;
• Киікті табиғи ортаға қайта көшіру (реинтродукция) бағдарламасын әзірлеу;
• Ғылыми зерттеулер, мониторинг және тәжірибе алмасу жұмыстарын ұйымдастыру, оның ішінде бірлескен экспедициялар, рейдтер, мамандарды оқыту және популяция туралы деректер алмасу.

Ынтымақтастық аясында киікті қорғаудың негізгі бағыттары қамтылады. Атап айтқанда:

• трансшекаралық экожүйелерде киік санына, денсаулығына және көші-қонына мониторинг жүргізу;
• тіршілік ету ортасын қалпына келтіру және ареалдың бөлшектенуінің алдын алу;
• ғылыми, техникалық және генетикалық ақпарат алмасу;
• спутниктік бақылау және ветеринарлық қадағалау жүйелерін енгізу;
• браконьерлерге қарсы күресте табиғатты қорғау шараларын күшейту;
• халық арасында ақпараттық-түсіндіру науқандарын өткізу;
• есеп жүргізу әдістемелерін үйлестіру және ортақ деректер базасын құру;
• табиғатты қорғау бағдарламаларын іске асыруға халықаралық серіктестерді тарту.