Ташкент қаласында Өзбекстан Республикасы Сыртқы істер министрінің орынбасары Бобур Усманов пен Қазақстан Республикасының Өзбекстандағы Төтенше және Өкілетті Елшісі Бейбіт Атамқұловтың қатысуымен екіжақты кездесу өтті.
Кездесу барысында тараптар Өзбекстан мен Қазақстан арасындағы стратегиялық серіктестікті одан әрі тереңдету жолдарын, сондай-ақ екі ел басшылары деңгейінде қол жеткізілген келісімдердің орындалу барысын жан-жақты талқылады. Бұл келісімдер өзара сауда-экономикалық, көлік-логистика, мәдени-гуманитарлық және аймақтық қауіпсіздік бағыттарында кең ауқымды ынтымақтастықты көздейді.
Тараптар елдер арасындағы достық, тату көршілік және көпжақты өзара қолдау рухында құрылып келе жатқан серіктестікті одан әрі нығайтудың маңыздылығын ерекше атап өтті. Осы орайда, жоғары деңгейдегі сапарлар нәтижесінде қалыптасқан өзара түсіністік пен сенім – өзара ынтымақтастықтың сенімді негізі екені айтылды.
Сұхбат аясында жақын және орта мерзімге жоспарланған екіжақты және көпжақты іс-шаралардың күнтізбелік жоспары қаралып, олардың табысты өтуі үшін нақты қадамдар мен үйлестіру механизмдері бойынша пікір алмасылды. Бұл өз кезегінде екі мемлекет арасындағы тұрақты саяси диалогты одан әрі жандандыруға ықпал етпек.
Кездесу ашық әрі іскерлік жағдайда өтіп, тараптар барлық деңгейдегі өзара байланысты жүйелі түрде жалғастыруға және тығыз қарым-қатынасты одан әрі дамытуға дайын екендіктерін білдірді.