Yosh askarlar qasamyod qildi
Guliston shahridagi “Bilimdonlar maskani”da O‘zbekiston Milliy gvardiyasi Sirdaryo viloyati bo‘yicha boshqarmasi tashabbusi bilan o‘tkazilgan tantanali marosimda 83 nafar muddatli harbiy xizmatchi Vatanga, xalqqa va O‘zbekiston Respublikasi Prezidentiga sadoqat bilan xizmat qilishga qasamyod qildi.
Mazkur tadbir mamlakat tinchligi va xavfsizligini ta’minlashda inson omili — mas’uliyatli va vatanparvar yoshlar hal qiluvchi ahamiyat kasb etayotganini yana bir bor namoyon etdi. Chunki harbiy xizmat bugun nafaqat burch, balki davlat barqarorligi va jamiyat xavfsizligining muhim tayanchiga aylanmoqda.
Tadbirda mamlakatimizning turli hududlaridan harbiy xizmatga chaqirilgan navqiron yigitlar, ularning ota-onalari va yaqinlari, shuningdek, davlat va jamoat tashkilotlari vakillari, Qurolli Kuchlar faxriylari hamda ommaviy axborot vositalari ishtirok etdi. Bu esa marosimga o‘ziga xos ko‘lam va yuksak nufuz baxsh etdi.
An’anaga muvofiq tashkil etilgan marosim saf ko‘rigi bilan boshlanib, davlat madhiyasi ijro etildi. Maydonda hukm surgan intizom va harbiy tartib ishtirokchilarda katta taassurot qoldirdi. Davlat ramzlariga bo‘lgan hurmat va sadoqat tuyg‘ulari yana bir bor yaqqol namoyon bo‘ldi.
Tadbirning eng mas’uliyatli va hayajonli qismi — qasamyod qabul qilish jarayoni bo‘ldi. Unda 83 nafar muddatli harbiy xizmatchi Vatanga, xalqqa va O‘zbekiston Respublikasi Prezidentiga sadoqat bilan xizmat qilishga tantanali ravishda qasamyod qildi. Ushbu qasamyod har bir yosh askar uchun nafaqat huquqiy, balki yuksak ma’naviy mas’uliyatni ham anglatadi. Endi ular yurt sarhadlari daxlsizligini ta’minlash, tinchlik va barqarorlikni asrash yo‘lida o‘z burchini sidqidildan ado etish majburiyatini zimmasiga oldi.
Tadbirda Milliy gvardiya Sirdaryo viloyati bo‘yicha boshqarmasi boshlig‘i polkovnik Nizomiddin Abduvaliyev, viloyat hokimligi kotibiyati mas’ul xodimi Umid Abdullayev, O‘zbekiston yoshlar ittifoqi viloyat kengashi raisi Azizbek Rahmonov, Respublika Ma’naviyat va ma’rifat markazi viloyat bo‘limi rahbari Murod Xaitov hamda Qurolli Kuchlar faxriylari ishtirok etdi.
Marosim davomida Milliy gvardiya qo‘mondonining tabrigi o‘qib eshittirildi. Shuningdek, so‘zga chiqqanlar davlat va jamoat tashkilotlari vakillari, yoshlar yetakchilari hamda askarlarning ota-onalari yoshlarga ezgu tilaklar bildirdi. Jumladan, Andijon viloyati Bo‘loqboshi tumanidan kelgan mehnat faxriysi, pedagog Lolaxon Matqosimova ona sifatida samimiy so‘zlari bilan yig‘ilganlarda katta taassurot qoldirdi.
– Vatan tinchligi va chegaralar daxlsizligi uchun xizmat qilayotgan har bir yigit mening farzandimdek aziz. Shuningdek, nabiram — oddiy askar Mansurbek To‘rayev ham ular safida. Barcha yigitlar o‘z zimmasidagi vazifani munosib ado etib, yurtga va Prezidentimizga sadoqat bilan xizmat qilishlariga ishonaman, – dedi Lolaxon Matqosimova.
Muddatli harbiy xizmatchilar nomidan so‘zga chiqqan askar Bobur Ro‘zimov safdoshlari nomidan Vatanga sadoqat bilan xizmat qilishga tayyor ekanliklarini ta’kidladi.
Qasamyod qabul qilgan yoshlar Mirzaobod tumanidagi Milliy gvardiyaning ixtisoslashtirilgan o‘quv markazida 40 kun davomida maxsus o‘quv-amaliy mashg‘ulotlarda ishtirok etib, zarur bilim va ko‘nikmalarni egallagan. Bu esa ularning harbiy tayyorgarligi va mas’uliyat hissining shakllanishida muhim omil bo‘ldi.
Marosimning badiiy qismi ham ko‘tarinki ruhda o‘tdi. Harbiy xizmatchilar tomonidan tayyorlangan ko‘rgazmali chiqishlar, qurol bilan bajarilgan mashqlar yig‘ilganlarda katta taassurot qoldirdi.
[gallery-28988]
Qasamyod marosimi nafaqat harbiylar, balki ularning ota-onalari qalbida ham faxr va iftixor tuyg‘ularini uyg‘otdi.
Bugun qasamyod qilgan bu yigitlar — shunchaki harbiy xizmatni boshlagan navqiron askarlar emas, balki mamlakat tinchligi va barqarorligiga daxldor bo‘lgan ulkan mas’uliyatni o‘z zimmasiga olgan yangi avlod vakillaridir. Zero, har qanday davlatning qudrati, avvalo, uni himoya qila oladigan, Vatan taqdiriga befarq bo‘lmagan farzandlari bilan o‘lchanadi. Gulistondagi ushbu marosim ana shunday fidoyi va mas’uliyatli yoshlar kamol topayotganining yorqin ifodasi bo‘ldi.
G‘ulom Primov, Umid Obidjonov (surat), O‘zA
