Трамп Германиядаги ҳарбий иштирокни қисқартириш имкониятини кўриб чиқмоқда (+видео)
АҚШ президенти Дональд Трамп Германиядаги америкалик ҳарбийлар сонини қисқартириш эҳтимолини билдирди. Бунга Трамп ва Мерцнинг Эрон масаласи бўйича келишмовчиликлари сабаб қилиб кўрсатилмоқда, дейилади Euronews хабарида.
Трампнинг бу баёноти Мерцнинг шу ҳафта бошида АҚШнинг Эрон билан урушда аниқ стратегияси йўқ, деб танқид қилганидан кейин янгради.
Трамп чоршанба куни ижтимоий тармоқларда: «Қўшма Штатлар Германиядаги қўшинлар сонини қисқартиришни кўриб чиқмоқда ва қарор яқин вақт ичида қабул қилинади», — деб ёзди.
АҚШнинг Германияда бир нечта йирик ҳарбий объектлари мавжуд. Улар орасида Европа ва Африка қўмондонликлари штаб-квартиралари, Рамштайн авиабазаси ҳамда АҚШдан ташқаридаги энг йирик ҳарбий тиббиёт маркази бор.
Трампнинг бу баёнотларини НАТО га нисбатан танқидлари билан ҳам боғлаш мумкин. У альянсни икки ойдан бери давом этаётган Эронга қарши урушда АҚШга етарлича ёрдам бермаганликда айблади.
Трамп биринчи марта бундай фикр билдириши эмас. У аввалги президентлик даврида ҳам Германия ҳукуматини мудофаа учун кам маблағ ажратаётганликда айблаб, қўшинларни қисқартириш ниятида бўлган. 2020 йил июнь ойида у Германияда жойлашган тахминан 34,5 минг америкалик ҳарбийдан 9,5 минг нафарини олиб чиқиш режасини эълон қилган, аммо бу амалга ошмаган. Кейинчалик Жо Байден 2021 йилда президентлик лавозимига киришгач, бу режани бекор қилган.
Мерц олдинроқ, унинг Трамп билан шахсий муносабатлари илгаригидек яхши эканлигини айтган эди. Бироқ у Эронга қарши уруш бошланганидан бери муносабатларининг олдингидек эканлигига шубҳа қилаётганини таъкидлади.
У жорий йилнинг март ойида Оқ уйда Трамп билан учрашган. Ўшанда Мерц Эрондаги ҳукумат ўзгариши эҳтимолига оид режа ишлаб чиқиш масаласида Вашингтон билан ҳамкорлик қилишга тайёрлигини билдирган эди.
Германия канцлери шунингдек, узоқ давом этаётган можаро жаҳон иқтисодиётига катта зарар етказиши мумкинлигидан хавотир билдирди.
Унинг сўзларига кўра, Европа давлатлари, жумладан Германия, Ҳурмуз бўғози ёпилиши оқибатларидан жиддий азият чекмоқда.
Мерц можарони зудлик билан ҳал қилишга чақирмоқда. Трамп эса Мерцдан норозилигини яширмаяпти. Шунингдек, Германиянинг иқтисодий аҳволини ҳам танқид қилди.
<iframe width="650" height="420" src="https://www.youtube.com/embed/YrTOWbkIDvE" title="Tramp Germaniyadagi harbiy ishtirokni qisqartirish imkoniyatini ko‘rib chiqmoqda" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Кенжа Бекжонов, Анвархўжа Аҳмедов, ЎзА
