Сенатнинг бешинчи ялпи мажлиси ўз ишини давом эттирмоқда
Бугун, 2025 йил 18 март куни Ўзбекистон Республикаси Олий Мажлиси Сенатининг бешинчи ялпи мажлиси ўз ишини давом эттирмоқда.
Сенат Раиси Танзила Норбоева бошқараётган мажлис видеоконференцалоқа тизимидан фойдаланган ҳолда ўтказилмоқда. Мажлис жараёнлари Сенатнинг YouTube тармоғидаги расмий саҳифаси орқали онлайн ёритилмоқда.
Ялпи мажлиснинг биринчи иш кунида Президентимиз томонидан Коррупцияга қарши курашиш миллий кенгаши мажлисида белгилаб берилган устувор йўналишлардан келиб чиқиб, Сенат ҳамда халқ депутатлари маҳаллий кенгашлари олдида турган вазифалар кўриб чиқилди ва бу борада тегишли қарор қабул қилинди.
Сув кодексини тасдиқлаш, қишлоқ хўжалиги таваккалчиликларини суғурта қилиш, кредиторларнинг гаров билан таъминланган талабларини қаноатлантириш, заргарлик саноатини янада ривожлантириш, йўлларда ҳаракатланиш хавфсизлигини таъминлаш ҳамда жамоат транспортидан фойдаланиш самарадорлигини ошириш, судлар фаолиятининг ҳамда фуқаролар ҳуқуқ ва эркинликларининг кафолатларини кучайтириш, қамоққа олинганларга нисбатан қийноққа солиш ҳолларининг олдини олиш, қонун лойиҳаларни такомиллаштириш билан боғлиқ қонунлар маъқулланди.
Ялпи мажлис иккинчи иш кунида Олий Мажлиснинг Инсон ҳуқуқлари бўйича вакили (Омбудсман), Бола ҳуқуқлари бўйича вакил (Болалар омбудсмани)нинг 2024 йилдаги фаолияти бўйича ҳисоботлари эшитилади.
Шунингдек, бир қатор халқаро шартномаларни ратификация қилиш, гендер тенгликка эришиш стратегияси ижроси, ўзини ўзи банд қилиш тартибида меҳнат фаолиятини амалга оширишнинг айрим масалалари юзасидан ҳукуматга юборилган парламент сўрови натижалари тўғрисидаги масалалар ҳам мажлис кун тартибидан ўрин олган.
Ялпи мажлисда кўриладиган барча масалалар ҳақида батафсил ёритиб борамиз.
Н.Абдураимова,
Н.Ҳайдаров (сурат), ЎзА
