O‘zbekiston-Qirg‘iziston: energetika tizimlarining samarali nazorati bo‘yicha hamkorlik rivojlantiriladi
Energetika sohasida samarali nazoratni ta’minlash, energiya resurslaridan oqilona foydalanish va ta’minot barqarorligini oshirish bugungi kunda har bir davlat oldida turgan ustuvor vazifalardan biri hisoblanadi. Ayniqsa, global o‘zgarishlar sharoitida energetika tizimlarini modernizatsiya qilish, ilg‘or tajribalarni joriy etish va sohadagi institutsional hamkorlikni mustahkamlash muhim ahamiyat kasb etadi.
Shu nuqtai nazardan, xalqaro hamkorlik doirasidagi muloqotlar, tajriba almashuvi va qo‘shma tashabbuslar energetika nazorati tizimini yanada takomillashtirishga xizmat qiladi. Bu borada “O‘zenergoinspeksiya” va Qirg‘iz Respublikasi Energetika vazirligi huzuridagi Energetika nazorati xizmati delegatsiyasi o‘rtasida o‘tkazilgan uchrashuv muhim ahamiyatga ega.
Uchrashuvda tomonlar sohada erishilgan natijalar, amalga oshirilgan ishlar va kelgusidagi rejalar haqida fikr almashdi. Shuningdek, energiya ta’minoti ishonchliligini ta’minlash masalalariga alohida e’tibor qaratildi.
Tomonlar avtomatik o‘chishlar sabablarini muhokama qilib, ularni tahlil qilish va oldini olish bo‘yicha tajriba almashdi. Bu nafaqat milliy energetika tizimlarining samaradorligini oshirishga, balki uzoq muddatli barqarorlikni ta’minlashda ham muhim o‘rin tutadi.
Inspeksiya axborot xizmatining ma’lum qilishicha, mazkur uchrashuv ikki mamlakat energetika inspeksiyalari o‘rtasida to‘g‘ridan-to‘g‘ri hamkorlikni yo‘lga qo‘yishda ilk qadam bo‘lib, kelgusida tajriba almashish va hamkorlikni rivojlantirish uchun asosiy platformani tashkil etadi. Shu kabi muloqotlar nafaqat milliy energetika tizimlarining samaradorligini oshirish, balki mintaqaviy barqarorlikni ta’minlashga ham hissa qo‘shadi.
N.Ziyodullayeva,
O‘zA
