Мемлекет басшысы Бұхара облысының жаңа әкімшілік орталығының жұмысымен танысты
Президент Шавкат Мирзиёев Бұхара қаласына жасаған сапары барысында Бұхара облысының жаңа әкімшілік орталығында жүргізіліп жатқан құрылыс және абаттандыру жұмыстарымен танысты.
Бұл кешен Қашқадария облысы «Кукдала» ауданы аумағында сынақтан өткен басқару органдарын біріктіру тәжірибесінің жалғасы болып табылады. Онда 38 мемлекеттік мекеме бір жерге шоғырланып, халыққа айтарлықтай қолайлы жағдай жасалған. Бұрын әртүрлі мәселемен алыстағы аудандарға барған азаматтар енді барлық қызметті өздеріне жақын жерден алу мүмкіндігіне ие болды.
Мемлекет басшысы өткен жылы осы ауданға сапары кезінде мұндай тәсілдің барлық аудандар үшін үлгі екенін атап өткен еді. Содан бері бұл тәжірибе басқа өңірлерде де кеңінен енгізіле бастады.
Атап айтқанда, Бұхарадағы әкімшілік орталық 14 гектар аумақты қамтиды. Алғашқы кезеңде облыс және қала әкімдіктері, облыстық прокуратура мен ішкі істер басқармалары сияқты мемлекеттік органдар бір жерге топтастырылған. Бұл, ең алдымен, жергілікті атқарушы билік органдарының үйлесімді жұмысын жақсартып, азаматтардың өтініштерін қарауды жеделдетуге және мемлекеттік қызмет сапасын арттыруға мүмкіндік береді.
Кешен тек әкімшілік ғимараттардан ғана тұрмайды. Мұнда тұрғындардың демалуына арналған саябақтар, субұрқақтар мен жасыл аймақтар да салынып жатыр.
Президент облыс әкімдігінің жаңа ғимаратындағы құрылыс жұмыстарымен танысты.
Азаматтарға қолайлы жағдай жасау, түрлі мәселелер бойынша әр мекемені жағалап жүрмей, қажетті қызметтердің барлығын бір жерде алуын қамтамасыз ету мақсатында мемлекеттік органдарды бірыңғай әкімшілік орталықтарға біріктіру жұмысын жалғастыру қажеттігі атап өтілді.
Сондай-ақ Мемлекет басшысына өңірді әлеуметтік-экономикалық дамыту және халыққа қолайлы жағдай жасау бағытында атқарылып жатқан жұмыстар таныстырылды.
Атап айтқанда, банктер жасанды интеллект көмегімен өңірлер мен махаллалар бөлінісіне қарай талдау жүргізіп, Бұхара ауданы мысалында даму нүктелерін анықтаған. Бұл талдаулар жер, су, еңбек ресурстары, нарық сұранысы, инфрақұрылым және өндірістік қуаттарды кешенді бағалауға мүмкіндік берді. Нәтижесінде ауданда агробизнес, туризм, өнеркәсіп және жол бойы қызметтері ең перспективалы бағыттар ретінде айқындалған.
Осыған орай, 15 мың гектар жерді игеру, 500 гектар жаңа жүзім алқаптарын құру, энотуризмді дамыту, сондай-ақ мұнай-газ, химия, құрылыс және азық-түлік салаларында жаңа жобаларды жүзеге асыру мүмкіндіктері қарастырылған. Талдауларға сәйкес, 2026–2031 жылдары бұл бағыттар бойынша 7,4 триллион сумдық жобаларды іске асырып, 15 мың жаңа жұмыс орнын ашуға болады.
Сонымен қатар аудандағы 36 махалланы 6 негізгі бағытқа — жүзім шаруашылығы, жеміс-көкөніс өсіру, мал шаруашылығы, бау-бақша, туризм және қызмет көрсету салаларына мамандандыру ұсынылды. Жобаларды жедел әзірлеу және іске асыру үшін жасанды интеллект негізінде ресурс базасын қалыптастыру, бизнес-жоспарларды автоматты түрде жасау, қаржы қозғалысы мен нәтижелерді нақты уақыт режимінде бақылау жүйелері әзірленіп жатыр.
Мемлекет басшысы жасанды интеллект мүмкіндіктерін пайдалана отырып, әрбір өңірдің әлеуетін ашу, жобаларды нақты нәтижеге бағыттау және халықтың табысын арттыруға ықпал ететін бастамаларды қолдау маңызды екенін атап өтті.
