Электр энергетикасида технологик ҳолатлар бўйича ягона ҳисоб юритилади
Ўзбекистон Республикаси Вазирлар Маҳкамасининг 2025 йил 31 декабрдаги 850-сон қарори билан электр энергетикаси тизимида технологик бузилишларни текшириш ва ҳисобга олишнинг ягона тартиби белгиланди.
Мазкур қарор билан “Электр энергетикаси тизимида технологик бузилишларни текшириш ва ҳисобга олиш тартиби тўғрисида”ги низом тасдиқланди.
Низомга мувофиқ, электр энергетикаси тизими фаолияти давомида юзага келадиган қатор технологик бузилишлар мажбурий равишда текширилиши ва расман ҳисобга олиниши шарт. Жумладан, электр қурилмаларининг эксплуатация жараёнида, режали таъмирлаш, профилактика кўриклари ва синовлар вақтида аниқланган шикастланиш ҳолатлари шулар жумласидан.
Шунингдек, электр қурилмалари ва уларнинг элементлари ишдан чиқишига олиб келган, техник ёки технологик ҳолат параметрларининг рухсат этилмаган даражада четга чиқиши ҳам технологик бузилиш сифатида қайд этилади. Бундан ташқари, истеъмолчиларга электр энергиясини қисман ёки тўлиқ режалаштирилмаган ҳолда етказиб беришнинг тўхтатилиши ҳам текширув объекти ҳисобланади.
Технологик бузилишлар юзага келтирган оқибатларининг оғирлигига қараб, авариялар ҳамда I ва II даражадаги ишдан чиқишларга таснифланади. Бундай ҳолатларни текшириш жараёни улар аниқланган заҳоти бошланиб, ўн кун ичида якунланиши лозим.
Энергетика вазирлиги хабарига кўра, электр энергиясини ишлаб чиқариш, сақлаш, узатиш ва тақсимлаш билан шуғулланувчи корхонада, шунингдек, уларга тегишли электр тармоқларида содир бўлган барча технологик бузилишлар тегишли электр энергетикаси объекти томонидан ҳисобга олинади.
Н.Зиёдуллаева тайёрлади,
ЎзА
