«US Open-2026»: Мария Тимофеева ҳам иккинчи даврага йўл олди
Нью-Йоркдаги "Катта дубулға" турнири қизғин давом этмоқда. Ўзбекистон вакиллари бу нуфузли мусобақада кутилмаган натижалар билан эътиборни тортди.
Америка Қўшма Штатларининг Нью-Йорк шаҳрида теннис бўйича «Катта дубулға» туркумига кирувчи «US Open-2026» турнирининг аёллар ўртасидаги яккалик баҳсларида асосий тўр биринчи давра учрашувлари давом этмоқда.
Мусобақанинг ушбу босқичида мамлакатимизнинг иккинчи рақамли теннисчиси Мария Тимофеева словениялик Тамара Зиданшекка қарши кортга чиқди ва 6:3, 7:5 ҳисобида ғалаба қозонди. Энди Мария иккинчи даврада испаниялик Кейтлин Кеведо ва бельгиялик Элизе Мертенс ўртасидаги учрашув ғолиби билан куч синашади.
Эслатиб ўтамиз, куни кеча Америка очиқ чемпионатининг биринчи босқичида ҳамюртимиз Камилла Раҳимова чехиялик Барбора Крейчиковани 7:6, 6:4 ҳисобида енгган эди. Айни дамга келиб, Камилланинг навбатдаги рақиби ҳам аниқланди. У иккинчи даврада испаниялик Оксана Селехметевага қарши рақобатлашади.
Жавоҳир Тошхўжаев,
ЎзА
