Трамп: Эрон билан дастлабки келишув имзоланди
АҚШ президенти Дональд Трамп Эрон билан урушни тўхтатишга қаратилган дастлабки келишув имзоланганини айтди ва келишув тафсилотлари яқин кунларда эълон қилинишини билдирди, деб хабар берди ВВС нашри.
АҚШнинг юқори лавозимли амалдорлари маълум қилишича, Ҳурмуз бўғози жума куни қайта очилади. Шу куни Женева шаҳрида келишув расман имзоланиши кутилмоқда.
Уларнинг айтишича, Эроннинг ядровий дастури бўйича техник музокаралар шу ҳафта бошланади. Санкцияларни юмшатиш ёки музлатиб қўйилган маблағларни озод қилиш эса Эроннинг келишув шартларини бажаришига боғлиқ бўлади. АҚШ вице-президенти Жей Ди Вэнснинг таъкидлашича, ҳужжатнинг биринчи бандида Эрон минтақада тинчлик ва барқарорликни таъминлашга интилиши, шу жумладан террорчи ташкилотларни молиялаштиришни тўхтатиши кўзда тутилган.
Трамп келишув матни жума куни бўладиган маросимдан кейин тез орада оммага тақдим этилишини билдирди.
Покистон бош вазири Шаҳбоз Шариф, музокараларда воситачилик қилган давлат раҳбари сифатида, барча фронтларда, жумладан Ливанда ҳам ҳарбий ҳаракатларни зудлик билан ва доимий равишда тўхтатиш бўйича келишувга эришилганини маълум қилди.
Исроил бош вазири Биньямин Нетаньҳу эса мамлакат қўшинлари Ливан, Сурия ва Ғазодаги хавфсизлик ҳудудларида зарур бўлган вақтгача қолишини билдирди. У, шунингдек, Эронга ядровий қуролга эга бўлишга йўл қўйилмаслигини таъкидлади.
Трампнинг сўзларига кўра, дастлабки келишув имзолангандан кейин Ҳурмуз бўғози тўлиқ очилади.
Шу билан бирга, Эрон ташқи ишлар вазирлиги Теҳрон ҳануз АҚШга нисбатан чуқур ишончсизлик сақлаб қолаётганини ва бу келишув фақат кескинликни камайтириш йўлидаги дастлабки қадам эканини билдирди.
Можаронинг баҳсли масалалари Эроннинг уран бойитиш дастури, Ғарб давлатларининг Эрон ядровий қуролга эга бўлмаслиги ҳақидаги талаби, шунингдек, Эроннинг санкцияларни тўлиқ бекор қилиш ва музлатилган миллиардлаб долларлик нефть даромадларидан фойдаланиш истаги бўлиб қолмоқда.
<iframe width="650" height="420" src="https://www.youtube.com/embed/dmnxB9f7LXs" title="Tramp: Eron bilan dastlabki kelishuv imzolandi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Кенжа Бекжонов, Анвархўжа Аҳмедов, ЎзА
