Сомали қирғоқларида Туркияга тегишли юк кемаси қароқчилар томонидан эгалланди
Жорий ҳафта бошида Сомалининг Пунтленд минтақаси қирғоқларида қароқчилар Камерун байроғи остида сузаётган “M/V LUTUF” юк кемасини эгаллаб олди ва Нугал қирғоқлари томон олиб кетди.
Таъкидланишича, “Polar Movement Shipping” компаниясига тегишли бўлган ушбу кема Эйл тумани яқинида, қирғоқдан тахминан 3,5 денгиз мили узоқлигида қўлга олинган. Бортда Туркиянинг Могадишодаги ҳарбий ўқув маркази учун мўлжалланган қурол-яроғлар, шунингдек, алоқа ва сунъий йўлдош ускуналари бўлган.
Кема экипажида Ҳиндистоннинг 6 нафар, Туркия ва Грузиянинг 1 нафардан фуқароси ҳамда Сербиядан 2 нафар хавфсизлик соқчиси бўлган. Ҳужумни аввал ҳам кемаларни эгаллаб олишда гумон қилинган 8 нафар қароқчи амалга оширган ва кемани Дангоройо туманидаги Нугал қирғоқлари томон йўналтирган.
Кейинчалик ҳудудга Туркияга тегишли яна иккита кема яқинлашган, ҳавода эса Туркия вертолётлари ва дронлари кузатув олиб борган.
Ф.Яхшибоева, ЎзА
