АҚШда самолёт ва вертолёт тўқнашиб кетди
АҚШнинг Пенсильвания штатидаги Карлайл аэропортида енгил моторли самолёт қўниш вақтида йўналишидан четлашиб, ерда турган полиция вертолёти билан тўқнашиб кетди.
Транспорт хавфсизлиги миллий кенгаши (NTSB) вакили Аарон Маккартернинг маълум қилишича, ҳодиса оқибатида самолёт учувчиси ҳалок бўлган, вертолётдаги икки нафар полициячи эса жароҳат олган. Расмийлар фожианинг аниқ сабаблари ҳали номаълумлигини билдирмоқда.
Маълумотларга кўра, “Cessna 150” учоғи учиш-қўниш йўлагига қўнаётган маҳал тўсатдан ён томонга бурилиб, ўқув машғулоти доирасида майсазор устида турган “Bell 407” вертолётининг дум қисмига бориб урилган.
Тўқнашув зарбидан икки ҳаво кемаси ҳам бўлакларга бўлиниб кетган. Кичик аэропортда диспетчерлик минораси бўлмаса-да, учувчилар умумий частотада ўзаро алоқада бўлишган. Терговчилар таъкидлашича, самолёт учувчиси ҳудудда вертолёт борлигидан хабардор қилинганига оид далиллар мавжуд. Ҳозирда мутахассислар самолётнинг траекториядан чиқиб кетишига техник носозлик ёки бошқа омиллар сабаб бўлганини ўрганмоқда.
Ф.Яхшибоева, ЎзА
