Сурхондарёда ўрмон ёнғинларига қарши амалий машғулот ташкил этилди
ФОТОРЕПОРТАЖ
Сурхондарё вилоятида ўрмон ҳудудларида юз бериши эҳтимол тутилган ёнғинларнинг олдини олиш, шунингдек, фавқулодда ҳолатларда турли куч тузилмалари ўртасидаги ўзаро ҳаракатларни яхшилаш мақсадида тактик-амалий ўқув ташкил қилинди.
Ушбу тадбир Термиз гарнизони ёнғин назорати инспекцияси томонидан Шеробод туманидаги тоғли ҳудудда уюштирилиб, унда турли куч тузилмаларининг ҳарбий хизматчилари қатнашди.
Машғулотнинг назарий қисми давомида қатнашчиларга ёнғин юз берган жойда тезкор ҳаракатланиш, уни энг қисқа фурсатда бартараф этиш ва хавфсизлик талабларига амал қилиш борасида зарур тушунтиришлар берилди.
[gallery-30537]
Амалий қисмда эса ёнғин ўчириш машиналари бемалол кира олмайдиган тоғли жойларда ёнғинни йўқотишнинг ўзига хос усуллари амалда синаб кўрилди. Бунинг учун махсус резинадан тайёрланган сув омборлари ўрнатилиб, тоғ сойидан насос ёрдамида сув билан тўлдирилди. Сўнгра бу сув алоҳида идишларга қуйилиб, узоқдан бошқариладиган «Карчер» ускунаси воситасида шартли ёнғин бартараф қилинди.
Ўқув давомида турли куч тузилмалари орасидаги ҳамжиҳатлик, ҳарбий хизматчиларнинг фавқулодда ҳолатларда тезкор ва мувофиқлашган тарзда ҳаракат қилиш малакалари, шунингдек, ёнғинга қарши техник воситалардан унумли фойдаланиш кўникмалари яхшиланди.
Бундай тадбирлар табиий ёнғинларнинг олдини олишга, аҳоли ҳамда экология хавфсизлигини таъминлашга, шунингдек, фавқулодда вазиятларга тайёргарлик даражасини юксалтиришга кўмаклашади.
Жонибек ҚЎЗИМУРОДОВ(сурат),ЎзА
