Шўрчида янги хусусий клиника иш бошлади (+видео)
Сурхондарё вилоятининг Шўрчи туманида “Мурод шифо” хусусий тиббий маркази фойдаланишга топширилди.
Лойиҳа қиймати тўрт миллиард сўмлик замонавий тиббиёт муассасасининг очилиш маросимида мамлакатимизда кейинги йилларда инсон қадри улуғланиб, саломатлигини муҳофаза қилишга алоҳида эътибор қаратилаётгани таъкидланди. Бунинг учун аҳолига сифатли тиббий хизмат кўрсатиш йўлга қўйилаётгани, янги-янги тиббиёт муассасалари барпо этилиб, эл саломатлиги йўлида самарали хизмат қилаётгани қайд этилди.
Туманда фойдаланишга топширилган 65 ўринли янги тиббиёт муассасасида ҳам беморлар учун барча қулайлик мавжуд. Замонавий тиббий ускуналар билан жиҳозланган.
– Клиникамизда невропатолог, кардиолог, терапевт, гинеколог, УЗИ доплер аппаратлари ҳамда лаборатория инструментал текширувларга асосланган, – дейди бош шифокор Қаҳрамон Аллаёров. – УЗИ доплер аппаратларимизда ҳомиладорлик ва турли нуқсонларини эрта аниқлаш, сифатли хизмат кўрсатиш мақсад қилинган. Лаборатория инструментал дехла аппаратида 210 хилдан ортиқ анализни қисқа фурсатда текшириш мумкин.
Замонавий янги шифохонанинг барпо этилгани тумандаги ёшу кексага бир олам қувонч улашди.
– Туманимизда энг кўзга кўринган, халқимизга сифатли хизмат қиладиган тиббиёт клиникаси фойдаланишга топширилди, – дейди меҳнат фахрийси Ўрол Чўтбоев. – Минглаб одам келиб, шу ерда даволанади. Тошкент шаҳрига ёки бошқа вилоятларга боришига чек қўяди. Барча ускуналари талабга жавоб беради. Улар энг сўнгги русумдаги жиҳозлар бўлиб, барча касалликлар тез аниқланиб, беморлар шу ерда даволанади ва албатта, шифо топади.
Шифо масканида 53 нафар тажрибали олий ва ўрта маълумотли тиббиёт ходими иш билан таъминланди. Шу куни тиббиёт муассасаси илк мижозларини қабул қилди.
Очилиш маросими иштирокчилари тиббиёт марказида беморларга ташхис қўйиш жараёнлари ва даволаниш учун яратилган замонавий шароитлар билан яқиндан танишди.
<iframe width="650" height="420" src="https://www.youtube.com/embed/dUSm5skoNJA" title="Sho‘rchida yangi xususiy klinika ish boshladi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Холмўмин Маматрайимов, ЎзА мухбири
