Россияда “Google” ва “Telegram” тақиқланган контентни ўчирмагани учун жаримага тортилди

Москванинг Таганский туман суди Россия Федерациясида тарқатилиши ман этилган маълумотларни ўчириб ташламагани учун “Google” ва “Telegram” компанияларига нисбатан жарима жазосини қўллади. Бу ҳақда "Синьхуа" ахборот агентлиги хабар бермоқда.

Таъкидланишича, “Google” Россияда блокланган “Wheely” премиум трансфер сервиси ҳақидаги ахборотни олиб ташламагани сабабли иккита маъмурий ҳуқуқбузарлик протоколи бўйича 7,6 миллион рубль миқдорида жаримага тортилган. “Telegram” мессенжерига эса ҳақиқатга тўғри келмайдиган маълумотлар сабабли учта протокол асосида умумий ҳисобда 11,4 миллион рубль жарима солинди.

Бундан ташқари, “Apple” компаниясининг Ирландиядаги бўлинмаси ҳам тақиқланган контент учун 3,5 миллион рубль миқдорида жаримага тортилган. Маълумот учун, “Telegram”нинг РФ қонунчилигини бузганлик учун ўз вақтида тўланмаган жарималар бўйича умумий қарздорлиги 38 миллион рублдан ошиб кетган.

Ф.Яхшибоева, ЎзА