Ўзагроинспекция: 54 техника нотўғри ишлатилган, 1 минг 235 субсидия рад этилган
Қишлоқ хўжалиги техникасини харид қилишда давлат томонидан ажратиладиган субсидиялардан самарали фойдаланишни таъминлаш ҳамда субсидия асосида харид қилинган техникаларнинг мақсадли ишлатилишини назорат қилиш “Ўзагроинспекция”нинг муҳим вазифаларидан биридир.
Ҳукуматнинг 2026 йил 28 апрелдаги тегишли қарори ижросини таъминлаш мақсадида назорат тадбирлари амалга оширилмоқда.
Хусусан, жорий йилнинг январь ойида 3 минг 330 дона, июль ва август ойларида эса 3 минг 520 дона қишлоқ хўжалиги техникаси ҳамда лазерли ер текислагичлардан мақсадли ва самарали фойдаланиш ҳолати жойига чиққан ҳолда мониторинг қилинди. Мониторинг натижаларига кўра, 29 дона, июль ва август ойларида эса 25 дона техника ва лазерли ер текислагичлардан мақсадсиз ҳамда самарасиз фойдаланиш ҳолатлари аниқланди. Мазкур ҳолатлар юзасидан тузилган далолатномалар тегишли чора кўриш учун Бош прокуратура ва Аграр соҳада тўловлар агентлигига киритилди.
Шунингдек, қишлоқ хўжалиги техникасини харид қилиш учун субсидия олиш бўйича юридик шахслардан келиб тушган 2 минг 597 та ҳужжат Аграр соҳада тўловлар агентлигига юборилди. Агентлик томонидан ушбу ҳужжатларнинг 826 таси бўйича субсидия ажратилган, 1 минг 235 таси рад этилган, 536 таси эса кўриб чиқилмоқда.
Маълумот ўрнида таъкидлаш лозимки, янги қишлоқ хўжалиги техникасини харид қилиш учун субсидия олишни истаган жисмоний ва юридик шахслар доимий рўйхатдан ўтган манзили бўйича “Ўзагроинспекция”нинг ҳудудий бошқармасига мурожаат қилишлари мумкин.
“Ўзагроинспекция” матбуот хизматининг маълум қилишича, тақдим этилган ҳужжатлар ҳамда техниканинг давлат рўйхатидан ўтказилганидаги техник маълумотлари тегишли ахборот тизими орқали реал вақт режимида Аграр соҳада тўловлар агентлигига юборилади. Ҳужжатларни кўриб чиқиш якунида субсидия ажратиш ёки уни рад этиш тўғрисидаги қарор Агентлик томонидан қабул қилинади.
Муҳайё Тошқораева,
ЎзА
