Oilaviy qadriyatlarni mustahkamlash komissiyasi ishlayapti
Oiladagi bir kunlik sovuqchilik ba’zan butun xonadonning tinchini buzadi. Kechagina bir dasturxon atrofida jam bo‘lib, bir-birining ko‘ziga mehr bilan boqqan insonlar gina-kudurat, ranjishlar girdobida qolishi, bir og‘iz og‘ir so‘z esa yillar davomida asrab kelingan ishonchga darz ketkazishi mumkin.
Eng achinarlisi, er-xotin o‘rtasida boshlangan kelishmovchilikning og‘rig‘ini ko‘pincha ularning farzandlari tortadi. Shu bois oilaviy ajrimni ikki insonning shaxsiy qarori, debgina baholash to‘g‘ri emas. Bu farzandlar kelajagi, xonadon osoyishtaligi, mahalla ahilligi va jamiyat ma’naviy muhitiga daxldor masala.
Jizzax viloyati Do‘stlik tumanining Sanoatchilar mahallasida oilaviy nizolarning oldini olish borasida olib borilayotgan ishlar ana shu hayotiy haqiqatni yana bir bor namoyon etdi. Mahallada Oilaviy qadriyatlarni mustahkamlash komissiyasi reja-grafik asosida har haftada bir kun ajrim yoqasida turgan va turli kelishmovchiliklarga duch kelgan oilalar bilan uchrashib, ularning dardini tinglaydi, muammolar yechimini birgalikda izlaydi.
Navbatdagi uchrashuvda to‘rt oila vakillari bilan ochiq muloqot o‘tkazildi. To‘rtta xonadon – to‘rt xil taqdir, to‘rt xil dard, balki aytilishini kutib turgan qanchadan-qancha gaplar, ko‘ngilda qolgan armonlar... Har bir oilaning o‘z tashvishi, o‘z haqiqati bor. Biroq oilaviy munosabatlarni asrab qolish istagi, farzandlar kamolini o‘ylash va osoyishta hayotga qaytish ehtiyoji ularni bir nuqtada birlashtiradi.
Muloqotda tomonlarning o‘zaro munosabatlarini tiklash, bir-birini tinglash, ranjish va kelishmovchiliklarni bosiqlik bilan hal etish, ishonchni qayta mustahkamlash masalalariga e’tibor qaratildi. Suhbatlar yakunida ikki oilaning yarashtirilishiga erishildi. Qolgan ikki oilaning muammolarini chuqurroq o‘rganish va ularga amaliy ko‘mak ko‘rsatish uchun qo‘shimcha muddat belgilandi.
Albatta, ikki oilaning yarashuvi – quvonarli natija. Ammo bu raqam ortida yanada katta ma’no bor: kelishmovchiliklar avjiga chiqmasidan oldin odamlarni tinglash, ularga vaziyatni xotirjam baholash imkonini berish va muammoni murosa bilan hal etishga ko‘maklashish mumkin. Shu bilan birga, har bir oilaning holati o‘ziga xos ekanini unutmaslik, yarashuvni shunchaki natija ko‘rsatkichiga aylantirmasdan, uning barqarorligini ta’minlashga intilish zarur.
Zero, oilani saqlab qolish faqat er-xotinni bir xonadonga qaytarishdan iborat emas. Muhimi, ularning qalbidagi ishonchni tiklash, bir-birining qadriga yetishga o‘rgatish va nizoni keltirib chiqargan sabablarni bartaraf etishdir. Agar muammo hal etilmasa, aytilmagan gaplar va yig‘ilib qolgan alamlar yana bir kun bosh ko‘tarishi mumkin. Shuning uchun oilalar bilan ishlashda samimiy muloqot, zarur hollarda malakali mutaxassislar ko‘magi va muntazam kuzatuv muhim ahamiyat kasb etadi.
Uchrashuvda mahallaning nuroniy otaxon va onaxonlari ham yosh oilalar bilan suhbatlashib, hayot tajribalari bilan o‘rtoqlashdilar. Ularning sabr-toqat, hurmat, kechirim va murosa haqidagi fikrlari shunchaki nasihat emas, balki yillar sinovidan o‘tgan hayotiy xulosalardir. Chunki oilada har doim ham bir tomonning haqligini isbotlash emas, balki ikki tomonning bir-birini tushunishi ko‘proq ahamiyat kasb etadi.
Oilaviy nizolarning eng og‘ir yuki esa ba’zan tili chiqmagan bolaning sukutida, ota-onasini birga ko‘rishni istagan farzandning ko‘zlarida namoyon bo‘ladi. Kattalar o‘rtasidagi kelishmovchiliklar bolalarning ruhiy xotirjamligiga, ta’limiga va kelajakdagi munosabatlariga ta’sir ko‘rsatishi mumkin. Shu bois har qanday nizoda farzandlar manfaatini unutmaslik, ularni kattalar o‘rtasidagi mojarolardan asrash har bir ota-onaning muqaddas mas’uliyatidir.
O‘zbekiston Respublikasi Prezidentining 2022-yil 7-martdagi “Oila va xotin-qizlarni tizimli qo‘llab-quvvatlashga doir ishlarni yanada jadallashtirish chora-tadbirlari to‘g‘risida”gi farmonida oilalarni mustahkamlash, xotin-qizlarni qo‘llab-quvvatlash va ularning huquqlarini himoya qilishga qaratilgan vazifalar belgilangan.
Sanoatchilar mahallasidagi kabi profilaktik uchrashuvlar oilaviy muammolarni barvaqt aniqlash, nizolarning oldini olish va xonadonlarga manzilli yordam ko‘rsatish borasidagi ishlarning ahamiyatini ko‘rsatadi.
Abdujalol Qayumov,
O‘zA muxbiri
