Кореянинг йирик компаниялари иштирокида халқаро Roadshow ўтказилди
Ўзбекистоннинг Smart Bio Cluster лойиҳаси Кореяда халқаро инвесторлар эътиборига ҳавола этилди. Биофармацевтика ва биотехнология саноатида янги давр очишга қаратилган бу ташаббус катта имкониятларни ваъда қилмоқда.
Тиббиёт ва фармацевтика тармоғини ривожлантириш агентлиги томонидан Корея Республикасида Smart Bio Cluster лойиҳасини халқаро инвесторларга тақдим этиш ва етакчи компанияларни лойиҳага жалб қилиш мақсадида ташкил этилган халқаро Roadshow иштирокчиларда катта таассурот қолдирди.
Тадбир Кореянинг Overseas Infrastructure & Development Cooperation (KIND) ташкилоти билан ҳамкорликда ўтказилиб, унда фармацевтика, биотехнология, тиббий технологиялар, инфратузилма ва инвестиция соҳаларида фаолият юритувчи 50 га яқин йирик компания вакиллари иштирок этди.
Тақдимот давомида иштирокчиларга Ўзбекистонда амалга оширилаётган Smart Bio Cluster лойиҳасининг асосий йўналишлари, инвестиция имкониятлари, лойиҳада иштирок этиш механизмлари, хорижий компаниялар учун яратилаётган шарт-шароитлар ва имтиёзлар ҳақида батафсил маълумот берилди.
Шунингдек, кластер доирасида биотехнология ва фармацевтика маҳсулотларини ишлаб чиқариш, илмий-тадқиқот фаолиятини ривожлантириш, инновацион технологияларни жорий этиш ва халқаро компаниялар иштирокида қўшма лойиҳаларни амалга ошириш имкониятлари тақдим этилди.
Мулоқот давомида Корея компаниялари вакиллари лойиҳанинг инвестициявий имкониятлари билан боғлиқ ўзларини қизиқтирган саволларга Агентлик директори Абдулла Азизов томонидан батафсил жавоб ва тушунтиришлар олди.
Тадбир якунида Кореянинг етакчи компаниялари билан тўғридан-тўғри мулоқотларни давом эттириш, Smart Bio Cluster лойиҳасига хорижий инвестицияларни жалб қилиш ва Ўзбекистонда замонавий биофармацевтика ҳамда биотехнология саноатини ривожлантиришга қаратилган ҳамкорликни кенгайтириш масалалари белгилаб олинди.
Моҳигул Қосимова, ЎзА
