Швеция Қироллик Фанлар академияси кимё бўйича 2025 йилги Нобель мукофотига Сусуму Китагава, Ричард Робсон ва Омар Ягҳини лойиқ кўрди.
Маълум қилинишича, олимлар глобал муаммоларни ҳал этишда улкан салоҳиятга эга бўлган юқори ғовакли материалларнинг янги синфи — металлорганик каркасларни ишлаб чиққанликлари учун ушбу мукофотни қўлга киритди.
Кимё бўйича Нобель қўмитаси раиси Хайнер Линке лауреатларни эълон қилар экан, газлар ва бошқа кимёвий моддалар оқиб ўтиши мумкин бўлган катта бўшлиқларга эга молекуляр тузилмаларни кашф қилгани учун олимларга ташаккур билдирди.
– Металл-органик каркаслар янги функцияларга эга буюртма материаллар учун илгари кутилмаган имкониятларни олиб келадиган улкан салоҳиятга эга, -деди Линке. – У жуда кичик ҳажмда жуда катта миқдордаги газни сақлай олади.
Бу тузилмалардан чўлда ҳаводан сув йиғишда, карбонат ангидридни тутиб қолишда, заҳарли газларни сақлашда ёки кимёвий реакцияларни тезлатишда фойдаланиш мумкин.
Совриндорлар 11 миллион швед кронаси (1 миллион АҚШ доллар) миқдоридаги пул мукофотига эга бўладилар.
Аввалроқ, тиббиёт ва физика йўналишларида 2025 йилги Нобель мукофоти совриндорлари ҳақида маълумот берган эдик.
Ў.Алимов, ЎзА