Швеция Қироллик Фанлар академияси физика бўйича 2025 йилги Нобель мукофотига Жон Кларк, Мишел Деворет ва Жон Мартинисни лойиқ кўрди.
Маълум қилинишича, олимлар макроскопик квант-механик туннел эффектини ҳосил қилиш ва электр занжирларида энергиянинг квантланишини кашф этгани учун ушбу мукофотни қўлга киритган.
1984-85 йилларда Кларк, Деворет ва Мартинис электр қаршиликсиз ток ўтказиш хусусиятига эга бўлган ўта ўтказгичлардан ясалган электрон занжир билан қатор тажрибалар ўтказган.
Хабарга кўра, ушбу кашфиёт квант технологиясининг кейинги авлодини, жумладан, квант криптографияси, квант компьютерлари ва квант сенсорларини ривожлантириш учун имкониятлар яратди.
Эртага кимё бўйича, 9 октябрда адабиёт бўйича, 10 октябрь куни тинчлик йўналиши бўйича Нобель мукофоти лауреатлари эълон қилинади. Бундан ташқари, 13 октябрда Швеция Марказий банки томонидан таъсис этилган Альфред Нобель хотирасига бағишланган иқтисодиёт йўналиши бўйича ҳам мукофот эгаси аниқланади.
Ў.Алимов, ЎзА