Ёш стол теннисчиларимиз Осиё чемпионатида
Таиланднинг Бангкок шаҳрида U15 ва U 19 жамоалари ўртасида ўтказилаётган ёшлар ўртасидаги ХХХ Осиё чемпионати қизғин паллага кириб бормоқда.
Чемпионатнинг жамоавий баҳсларида иштирок этаётган Ўзбекистон U15 ўғил болалар жамоаси 1/8 финал баҳсида Қозоғистон терма жамоасини 3:1 ҳисобида мағлуб этиб, мусобақанинг чорак финал босқичига йўл олди.
Кеча ўтказилган ярим финал йўлланмаси учун кечган шиддатли ўйинда Ўзбекистон U15 ўғил болалар жамоаси нафақат Осиёнинг, балки дунёнинг энг етакчи жамоаларидан бири Жанубий Корея стол теннисчилари билан куч синашди.
Шиддатли ўтган баҳсда ҳамюртларимиз Жанубий Корея терма жамоасига 0:3 ҳисобида имкониятни бой бериб, қитъа биринчилигини 5-ўрин билан якунлади.
Ёшлар ўртасида ХХХ Осиё чемпионатининг U19 ёш тоифасида иштирок этаётган Ўзбекистоннинг U19 ўғил болалар терма жамоаси мусобақанинг 1/8 финал босқичида Сингапур терма жамоасига қарши баҳс олиб борди. Учрашув 0:3 ҳисобида сингапурликларнинг устунлигида поёнига етди ва бу, U19 ўғил болалар терма жамоамиз жамоавий баҳслардаги иштирокини 1/8 финал босқичида тўхтатишига олиб келди.
Бугун, 30 июнь куни ўтказиладиган U15 ва U19 аралаш жуфтлик баҳсларида Ўзбекистон терма жамоаси аъзолари 30-Осиё чемпионатининг 1/32 финал баҳсида ўз иштирокини бошлайди.
Шунингдек, бугун чемпионат дастурига биноан U15 ёш тоифасида юртимиз стол теннисчиларидан Лочинбек Абдуҳалилов, Алихон Камолов, Ҳусайн Искандаров, Раҳматилло Абдурашидов, Эъзоза Хўрозова, Муниса Машарипова, Дилнавоз Омонова ва Аделина Ҳасанова яккалик баҳсларида ўз омадини синовдан ўтказади.
Чемпионат 5 июлга қадар давом этади.
Т. Рўзиев, ЎзА
