Волейболчи қизларимиз Таиландда 2027 йилги жаҳон чемпионати йўлланмаси учун курашади
Бугун, 30 июнь куни эрта тонгда волейбол бўйича Ўзбекистон U18 қизлар терма жамоаси Таиландда бўлиб ўтадиган U18 Осиё чемпионатида иштирок этиш учун жўнаб кетди.
Ёш волейболчиларимизни олдинда қитъанинг энг кучли жамоаларига қарши муҳим синовлар кутмоқда.
Осиё чемпионатига ташланган қуръа натижасига кўра, ҳамюртларимиз Таиланд, Австралия, Мўғулистон жамоалари билан “А” гуруҳдан жой олган бўлса, “Б” гуруҳида Хитой, Қозоғистон, Гонгконг, Қирғизистон, “С” гуруҳида Япония, Эрон, Филиппин, Индонезия, “Д” гуруҳида Жанубий Корея, Хитой Тайпейи, Ҳиндистон, Вьетнам жамоалари куч синашади.
Чемпионат ўйинлари 1-7 июль кунлари ўтказилса, мазкур биринчиликда энг яхши натижага эришган 4 та миллий терма жамоа 2027 йили U19 қизлар жамоалари ўртасида ташкил этиладиган жаҳон чемпионати йўлланмасини қўлга киритади.
Т.Рўзиев, ЎзА
