Украина Бош прокурори коррупция жанжали сабаб истеъфога чиқди (+видео)
Украина Бош прокурори Руслан Кравченко истеъфога чиқиш ҳақида ариза берганини маълум қилди. «Бу сиёсий қарор. Мен бу қарорни онгли равишда қабул қилдим. Бош прокурор лавозимидан сиёсий қарама-қаршилик воситаси сифатида фойдаланилишини истамайман. Менга қўйилаётган айбловлар бўйича позициям ўзгармаган», — деб ёзди Кравченко ўзининг Telegram каналида.
Ушбу қарор Кравченконинг қўл остидаги амалдорларидан бири, яъни Бош прокуратура халқаро ҳамкорлик департаменти раҳбари Сергей Крапивага коррупция бўйича айбловлар қўйилганидан кейин қабул қилинди.
Дам олиш кунлари Украина Миллий коррупцияга қарши кураш бюроси ва Ихтисослаштирилган коррупцияга қарши прокуратура жиноий гуруҳ фош этилганини маълум қилди.
Тергов маълумотларига кўра, бу гуруҳни Бош прокуратура раҳбарларидан бири бошқарган. Терговчиларнинг маълум қилишича, жиноий гуруҳ иштирокчилари фирибгарлик билан шуғулланувчи колл-марказлардан пора олган ва ноқонуний йўл билан топилган пулларни легаллаштирган.
Бош прокурорнинг ўзи эса бир неча бор колл-марказларга ҳеч қандай алоқаси йўқлигини ва ҳеч қандай жиноят содир этмаганини айтган.
Украина Миллий коррупцияга қарши кураш бюроси бу операция доирасида, жумладан, Кравченконинг хизмат хонаси ва уйида ҳам тинтувлар ўтказган.
Суд ишнинг асосий икки гумондорларини, Сергей Крапива ва унинг севгилиси Елизавета Ивахненкони ҳибсга олди.
Суд мажлиси вақтида Халқаро ҳамкорлик департаменти раҳбари Крапива билан бош прокурор Кравченко ўртасида яқин муносабатлар бўлгани маълум бўлди. Тергов материалларига кўра, Крапива Кравченконинг уйида таъмир ишларини ҳам бажарган. Иш бўйича барча гумондорлар ўз айбини инкор қилмоқда. Кравченко эса бундан аввал истеъфога чиқиш нияти йўқлигини айтган эди. «Украинская правда» нашрининг ёзишича, Украина президенти Володимир Зеленский 7 сентябрь куни Кравченко билан учрашиб, унинг истеъфоси масаласини муҳокама қилган.
Украина Конституциясига кўра, бош прокурорни президент лавозимидан озод қилиши учун Олий Раданинг розилиги талаб этилади. Парламент ўз ташаббуси билан ҳам бош прокурорга ишончсизлик билдириши мумкин.
Бош прокурор ўз хоҳиши билан истеъфога чиқиш ҳақида ариза берган тақдирда ҳам уни лавозимидан озод қилиш учун парламент қарори талаб этилади. Кравченко 2025 йил июнь ойида Украина Бош прокуратурасига раҳбар этиб тайинланган эди.
<iframe width="650" height="420" src="https://www.youtube.com/embed/B82AvartWAM" title="Ukraina Bosh prokurori korrupsiya janjali sabab iste’foga chiqdi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Кенжа Бекжонов, Салимжон Обиджонов, ЎзА
