Samarqanddagi bahs: iroda va ruhiy inqiroz to‘qnashuvi
Futbol bo‘yicha O‘zbekiston Superligasining 6-turidan o‘rin olgan “Dinamo” – “So‘g‘diyona” uchrashuvi (2:1) nafaqat navbatdagi kambek, balki ikki jamoaning bugungi holati, ruhiy tayyorgarligi va taktik salohiyatini ochib bergan bahs bo‘ldi.
Uchrashuvning dastlabki qismida tashabbus mehmonlar tomonida bo‘ldi. Jizzaxliklar maydonda mazmunli o‘yin namoyish etib, bir qator xavfli vaziyatlarni yuzaga keltirishdi. Ammo futbolning yozilmagan qoidasi — “urmaganga urishadi” tamoyili bu gal ham o‘z so‘zini aytdi. Birinchi bo‘limdagi samarasiz hujumlar mehmonlar uchun keyinchalik qimmatga tushdi.
Ikkinchi bo‘lim boshida, aniqrog‘i 51-daqiqada Lyupcho Doriyevning mahorati va Islom Qobilovning aniq zarbasi evaziga “So‘g‘diyona” oldinga chiqib oldi. O‘yinni nazorat qilayotgandek ko‘ringan mehmonlar aynan goldan keyin xotirjamlikka berilishdimi yoki raqibning bosimi oshdimi, har holda vaziyat keskin o‘zgardi.
O‘yin taqdiri 76 va 78-daqiqalar oralig‘ida hal bo‘ldi. “Dinamo”ning ketma-ket uyushtirgan ikki hujumi Anvarjon Hojimirzayev va Firdavs Abdurahmonovning gollari bilan yakunlandi. Bu ikki daqiqa – uchrashuvning kulminatsiyasi bo‘ldi.
“So‘g‘diyona” bosh murabbiyi Ulug‘bek Bakayev ta’kidlaganidek, jamoaning qisqa vaqt ichida “o‘chib qolgani” tizimli muammolardan dalolat beradi. Bu yerda gap faqat taktikada emas, balki bosim ostida psixologik muvozanatni saqlay olmaslikda. Ikki daqiqa ichida ikki gol o‘tkazib yuborish – ruhiy inqiroz belgisidir.
“Dinamo”ning g‘alabasida murabbiylar shtabining o‘z vaqtida amalga oshirgan rotatsiyalari muhim rol o‘ynadi. Zaxiradan maydonga tushgan Hislat Halilov va Firdavs Abdurahmonov o‘yinga yangi nafas va tezlik olib kirdi. Bu jamoada zaxira o‘yinchilarining sifati va murabbiyning vaziyatni to‘g‘ri baholay olishi kambekning asosiy omili bo‘lganini ko‘rsatadi.
Samarqanddagi bahs har ikki jamoa uchun jiddiy xulosalar beradi:
- “Dinamo” — har qanday og‘ir vaziyatda xarakter ko‘rsata oladigan, oxirigacha kurashadigan jamoaga aylanmoqda.
- “So‘g‘diyona” — o‘yinni nazorat qilish bilan birga, himoyadagi barqarorlik va ruhiy chidamlilik ustida ishlashi zarur.
Mazkur uchrashuv yana bir bor isbotladiki, Superligada nafaqat 90 daqiqa, balki har bir soniya va har bir vaziyat hal qiluvchi ahamiyatga ega. Futbolda ba’zan butun o‘yinni emas, bir necha daqiqalik konsentratsiyani yo‘qotish mag‘lubiyatga olib keladi.
Abdujalol Qayumov, O‘zA
