АFP Ўзбекистонда бюро очишга қизиқиш билдирди
Дунёнинг йирик ахборот агентликларидан бири - Agence France-Presse (AFP) Ўзбекистонда мухбирлик бюросини очишга қизиқиш билдирди.
Франциянинг Agence France-Presse (AFP) ахборот агентлиги Ўзбекистонда ўз мухбирлик бюросини очишга қизиқиш билдирди. Бу ҳақда Францияда бўлиб турган Ўзбекистон Журналистлар уюшмаси делегациясининг агентлик вакиллари билан учрашувида маълум қилинган.
Уюшма раиси Шуҳрат Ориповнинг маълум қилишича, мулоқотда рақамли журналистика, фактчекинг ва ахборот ишончлилигини таъминлаш масалалари муҳокама қилинган. Ўзбекистонлик журналистларни хорижий агентликнинг ўқув курслари орқали фактларни текшириш ва сунъий интеллект билан ишлашга ўргатиш бўйича ҳамкорлик қилишга келишилган.
Ушбу агентликнинг Digital Courses платформасида журналистлар ва журналистика талабалари учун бепул онлайн курслар мавжуд бўлиб, улар ахборот манбаларини текшириш, фото ва видеоларнинг аслини топиш, тасвир қаерда олинганини аниқлаш, ижтимоий тармоқларда маълумот излаш ҳамда интернетда хавфсиз ишлаш кўникмаларини қамраб олади. Курсни якунлаганларга сертификат берилади.
—Агентлик сунъий интеллект яратган контентни аниқлаш ва текширишга бағишланган алоҳида курсни ҳам ишга туширган. Унда журналистларга сунъий интеллектдан фойдаланишдаги яхши амалиётлар, сохта контент турлари ва уларни текшириш усуллари амалий машқлар орқали ўргатилади. Биз ҳам айни шу тажриба асосида ўзбек ОАВлари учун курслар ташкил этиш ниятидамиз, — дейди Шуҳрат Орипов.
Маълумот учун, AFP — дунёнинг учта йирик ахборот агентлигидан бири. Агентликнинг расмий маълумотига кўра, унинг халқаро тармоғи 210 та бюрони қамраб олади, хабарлар эса олти тилда ёритилади.
Санжар Тошпўлатов,
ЎзА
